Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 294 Hüküm no: 421 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Beşe’nin tarlasını Üveys b. Zülfikar’a sattığı Vilâyet-i Anadolu’da Bakır Küresi kazâsına tâbi‘ Kösreli nâm karye ahâlîsinden Ramazan Beşe b. Abdulkādir mahfil-i kazâda li-ebeveyn ammisi işbu bâ‘isü’l-kitâb Üveys b. Zülfikār mahzarında ikrâr ve takrîr-i kelâm edip karye-i mezbûre sınırında vâki‘ bir tarafı Abdülcemil tarlası ve iki tarafı dere ve bir tarafı tarîk-i âm ile mahdûd olan tarlamın hakk-ı tasarrufunu ma‘rifet-i sâhib-i arz ile içinde olan nehr-i cârî ve dağı ve yurt yeri ve samanlığı ile beş bin üç yüz nakd râyic fi’l-vakt akçe bedel mukābelesinde ammim mezbûr Üveys’e tefvîz edip ol dahi tefevvüz ve kabûl etmeğin zikrolunan tarladan ben kat‘-ı alâka edip bedel-i mezbûru merkūm Üveys yedinden tamamen ahz u kabz eylediğimden sonra ol türâbı mahallinde zabt ve tasarrufa ammim mezbûr Üveys’i taslît eyledim ba‘de’l-yevm keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Hurrire fi’l-yevmi’s-sâdis min-Ramazani’l-mübârek li-sene erba‘a ve sittin ve elf. Şuhûdü’l-hâl: Mustafa Çelebi b. Ali, el-Hâc Ebûbekir b. Şa‘ban, Ahmed Efendi b. el-Hâc Mustafa, el-Hâc Muslı b. Murad, Ahmed Beşe b. Mehmed, Mehmed Beşe b. Mustafa, Durmuş Beşe b. Abdülkerim, el-Hâc Hüseyin, Ahmed b. Hasan, İbrahim Çelebi b. David, Rıdvan b. Abdullah, Sarı Pîrî b. Hüseyin el-mücerred.