Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 272 Hüküm no: 278 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elvanzâde mahallesinden Ahmed Ağa’nın Kirkor’a borç verdiği parayı tahsil ettiği Dîvân-ı âlî kâtiblerinden olup mahmiye-i İstanbul’da Hocapaşa kurbünde Elvanzâde mahallesi ahâlîsinden orta boylu kara gözlü kara kaşlı taze kara sakallı bâ‘isü’l-vesîka Ahmed Ağa b. Mahmud nâm kimesne meclis-i şer‘-i hatîr-i lâzımü’t-tevkīrde yine mahmiye-i mezbûrede Tahtahan demekle ma‘rûf hânda ticâret vechi üzere mütemekkin orta boylu kara kaşlı kara gözlü kara bıyıklı Kirkor v. Mirze nâm Ermeni muvâcehesinde ikrâr-ı tâm ve takrîr-i kelâm edip mezbûr Kirkor bin yüz otuz yedi senesinde yedimden iki bin guruş istidâne ve kabz etmişidi. Hâlâ mesfûr Kirkor zimmî meblağ-ı mezbûr iki bin guruşu bana edâ ve teslîm ben dahi yedinden tamamen ahz u kabz eylediğimden sonra husûs-ı mezbûra ve târih-i vesîkaya gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve muhâsamâtdan her birimiz âharın zimmetlerini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 2 min-Muharremi’l-harâm li-sene 1144. Şuhûdü’l-hâl: Abdullah Ağa b. Hasan, Sâdık Efendi kâtib-i dîvân, Hüseyin Efendi kâtib-i dîvân, el-Hâc Osman Ağa b. ( ), el-Hâc Mehmed b. Abdurrahman el-mütevellî, el-Hâc Mahmud Ağa, Ali Efendi kâtib-i mâliye, Şâtır Mehmed Ağa, Mehmed Efendi.