Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 272 Hüküm no: 279 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Todori ve ortağı Mihal’in Yeniçeri tayinatları için Sekbân fırınına verdikleri unun parasını Gümrükten aldıkları Mîrî uncu tâifesinden Todori v. Yorgi ve şerîki Mihal v. Todori nâm zimmîler meclis-i şer‘-i şerîfde sâbıkā Gümrük-i âmire emîni umdetü’l-emâcid ve’l-a‘yân bâ‘isü hâze’l-kitâb Yeğen Mehmed Ağa b. Abdullah Ağa b. Abdurrahman’ın çukadârı tarafından husûs-ı âti’z-zikri tasdîka vekîl olduğu nehc-i şer‘î ve tarîk-ı mer‘î üzere sâbit olan Ahmed Ağa b. Abdulkadir mahzarında her biri ikrâr ve takrîr-i kelâm edip bin yüz kırk iki senesi şehr-i Ramazan-ı şerîfi’nin ikinci gününden kırk üç senesi şehr-i Rebî‘ülevveli’nin yirmi üçüncü gününe gelince yirmi sekiz hafta ve üç günde Fodula kâtibi mefharü erbâbü’t-tahrîr ve’l-kalem Hüseyin Efendi’nin yirmi sekiz aded tezkire ve üç günde Dergâh-ı âlî dâme mahfûfen bi’l-me‘ânî yeniçerileri ta‘yînâtlarıʼçün Sekbân fırınında şirâ ve kabza me’mûr olanlara bey‘ ve teslîm eylediğimiz on bin yüz yetmiş sekiz keyl ve on yedi vakıyye dakīkin her keyli yüz on ikişer akçeden cem‘an on bir yük kırk bin otuz altı akçe emîn-i müvekkil-i mûmâ-ileyhin mutasarrıf olduğu mârrü’z-zikr Gümrük-i âmire mâlından bâ-fermân-ı âlî havâle buyurulmağa ber-mûceb-i emr-i âlî emîn-i müvekkil-i mûmâ-ileyh Yeğen Mehmed Ağa ber-vech-i muharrer mutasarrıf olduğu Gümrük-i âmire mukāta‘ası mâlından olmak üzere meblağ-ı mecmû‘-ı mezkûr on bir yük kırk iki bin otuz altı akçeyi bize def‘ ve teslîm biz dahi yedinden tamamen ahz u kabz eyledik. Min-ba‘d meblağ-ı mecmû‘-ı mezkûrdan emîn-i müvekkil-i mûmâ-ileyh yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 4 min-Muharremi’l-harâm sene 1144. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Mehmed Çelebi b. Abdurrahman, Mustafa Çelebi b. Hasan, Du‘âcı İbrahim b. Mustafa, Yakub b. Abdullah, Abdullah Çelebi b. Mustafa.