Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 273 Hüküm no: 280 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Annesi tarafından evlendirilen henüz bâliğa olmayan Fatıma’nın muhâlaa yoluyla boşandıkları Mahmiye-i İstanbul’da Kumkapı kurbünde Seyyid Hasan mahallesi sâkinelerinden tahmînen on iki yaşında olan Fâtıma bt. Mehmed’in vâlidesi Rahime bt. Mehmed nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde mezbûre Fâtıma’nın zevc-i gayr-ı dâhili işbu bâ‘isü’l-kitâb Hüseyin b. İbrahim nâm kimesne mahzarında bi’l-velâye ikrâr ve takrîr-i kelâm edip mezbûr Hüseyin kızım mezbûre Fâtıma’nın zevc-i gayr-ı dâhili olmağın zimmetinde mütekarrir ve ma‘kūdün-aleyh beş bin akçe mehr-i müeccelinin nısfı olan iki bin beş yüz akçesi üzerine mezbûr Hüseyin ile bi’l-velâye muhâla‘a-i sahîha-i şer‘iye ile muhâla‘a eylediğimde mezbûr Hüseyin dahi hul‘-ı mezbûru kabûl eyledi. Eğer kızım mezbûre Fâtıma bâliğa oldukda hul‘-ı mezbûra râzıye olmayıp mehr-i mezkûru mezbûr Hüseyin’den taleb ve da‘vâ ve ahz eder ise me’hûzuna ben kendi mâlımdan dâmin ve kefîl oldum dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Muharrem sene [1]144. Şuhûdü’l-hâl: Mahalle-i mezbûre imâmı Salih Efendi b. Mehmed, Hüseyin Bey b. Mehmed, İbrahim Bey b. Musa, İbrahim b. Ahmed, Mehmed Ağa b. Abdullah, Ahmed Bey b. Mehmed, Bostânî Mehmed b. Hüseyin, Mehmed Çelebi b. Abdullah tahtacı.