Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 274 Hüküm no: 281 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmügülsüm’ün küçük kızı için nafaka talebi Mahmiye-i İstanbul’da merhûm ve mağfûrün-leh Sultan Süleyman Han tâbe serâhu câmi‘-i şerîfi kurbünde Taşodalar’ın birinde sâkine Şerîfe Ümmügülsüm bt. es-Seyyid el-Hâc Mehmed nâm hatun meclis-i şer‘-i şerîf-i enverde sâbıkā zevci işbu râfi‘u’l-kitâb Ahmed Bey b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ahmed Bey’in firâşından hâsıla ve benden mütevellide bi-hakkı’l-hıdâne hacr ve terbiyemde olan Şerîfe Zeyneb nâm sagīrenin ber-mûceb-i hüccet beher yevm on ikişer akçe nafaka-i mefrûzasından târih-i kitâba gelince on dört ayda müctemi‘ kırk iki guruşu mezbûr Ahmed Bey’den taleb ederim suâl olunup alıverilmesi murâdımdır deyü bir kıt‘a hüccet ibrâz edicek nazar olundukda hüccet-i mezkûre sagīre-i mezbûrenin min-kıbeli’l-üm ceddesi Âişe bt. el-Hâc Mehmed nâm hatun hakk-ı hıdâne kendinin olmak zu‘muyla takdîr ettirip mezbûr Ümmügülsüm’ün talebiyle takdîr olmamağın mezbûre Ümmügülsüm Hatun mezbûr Ahmed Bey’e bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 2 min-Muharremi’l-harâm sene [1]144 Şuhûdü’l-hâl: Çukadâr Abdullah b. Mehmed el-mübâşir, Mehmed Çelebi b. Abdullah, Mehmed Ağa b. Osman, Ahmed b. Mustafa, Abdullah b. Mustafa, Mustafa b. el-Hâc Mehmed, Ahmed b. Receb.