Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 274 Hüküm no: 282 Orijinal metin no: [68a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyidhasan mahallesinden Ayşe bt. Mehmed’in terekesinin vârisleri arasında taksimi Mahmiye-i İstanbul’da Seyyid Hasan mahallesinde sâkine iken bundan akdem fevt olan Âişe bt. Mehmed b. Abdullah nâm hatunun verâseti zevci Hüseyin b. İbrahim ile vâlidesi Rahime bt. Mehmed ve li-ebeveyn er karındaşları Hasan ve Ali ve Hüseyin ve Mehmed ve kız karındaşları Alîme ve Emine ve Fâtıma’ya münhasıra olmağla vâlidesi mezbûre Rahime ile karındaşı mezbûr Mehmed asâleten mezbûrûn Hasan ve Ali ve Hüseyin ve kız karındaşları mezbûretân Alîme ve Emine ve Fâtıma taraflarından husûs-ı âti’l-beyâna vekîl olduğu zât-ı mezbûretânı ârifân Ahmed Bey b. Mehmed ve Bostânî Mehmed b. Hüseyin nâm kimesneler şehâdetleriyle sâbit ve sübût-i vekâletine hükm-i şer‘î lâhık olan Hüseyin Bey b. Mehmed nâm kimesne meclis-i şer‘-i hatîr-i lâzımü’t-tevkīrde bâ‘îsü hâze’l-kitâb müteveffât-ı mezbûrenin terekesine vâzı‘u’l-yed olan zevc-i mezbûr Hüseyin mahzarında asâleten ve vekâleten her biri ikrâr-ı tâm ve takrîr-i kelâm edip mûrisemiz müteveffât-ı mezbûre Âişe’nin zevci mezbûr Hüseyin zimmetinde mütekarrir ve ma‘kūdün-aleyh bin akçe mehr-i müeccel ile vesâir beynimizde ma‘lûm terekesine müte‘allika âmme-i da‘vâdan mezbûr Hüseyin’in zimmetini asâleten ve vekâleten ibrâ-i âmm-ı râfi‘u’l-hısâm ile ibrâ ve ıskāt edip ba‘de’l-yevm müteveffât-ı mezbûrenin terekesine müte‘allika âmme-i da‘vâdan asâleten ve vekâleten her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Muharremi’l-harâm li-sene 1144. Şuhûdü’l-hâl: Mahalle-i mezbûre imâmı Salih Efendi b. Mehmed, Hüseyin Bey b. Mehmed, İbrahim Bey b. Musa, İbrahim b. Ahmed, Mehmed Ağa b. Abdullah, Ahmed Bey b. Mehmed, Bostânî Mehmed b. Hüseyin, Mehmed Çelebi [b.] Abdullah tahtacı.