Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 275 Hüküm no: 283 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın mülk arsasını istiğlâl yoluyla Kevâkibîzâde Abdullah Efendi’ye sattığı İstiğlâl. Mahmiye-i İstanbul’da hısnı ebvâbından Edirnekapısı dâhilinde Ali Paşa-yı atîk mahallesi ahâlîsinden fahrü’l-müderrisîni’l-kirâm Kevâkibîzâde Abdullah Efendi b. el-müvellâ el-merhûm Mustafa Efendi tarafından husûs-ı âti’z-zikri ikrâra vekîl olduğu Ahmed Efendi b. Ali ve el-Hâc Yusuf b. Mustafa nâm kimesneler şehâdetleriyle sâbit olan el-Hâc Mehmed b. Salih nâm kimesne meclis-i şer‘-i hatîr-i lâzımü’t-tevkīrde bâ‘isü hâze’l-kitâb Ali Ağa b. Feyzullah nâm kimesne mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkil-i mûmâ-ileyhin yedinde mülkü olup mahalle-i mezbûrede vâki‘ bir tarafdan ba‘zen mûmâ-ileyh Abdullah Efendi ve ba‘zen fahrü’l-müderrisîni’l-kirâm Şeyh Mehmed Efendi menzilleri ve bir tarafdan yine mezbûr Şeyh Mehmed Efendi menzili ve bir tarafdan Salbaşzâde Hasan Efendi tasarrufunda olan vakıf arsa ve bir tarafdan tarîk-ı âm ile mahdûd derûnunda iki bi’ri mâyı müştemil tahmînen bin iki yüz zirâ‘ mülk arsasını cemî‘ tevâbi‘ ve levâhıkı ile mezbûr Ali Ağa’ya bi-tarîkı’l-istiğlâl beş yüz elli guruşa bey‘ ve teslîm eylediğinde ol dahi ber-vech-i muharrer iştirâ ve tesellüm ve kabz ve kabûl ve semeni olan meblağ-ı mezbûr beş yüz elli guruşu mezbûr Ali Ağa yedinden tamamen ahz u kabz eylediğimden sonra mezbûr Ali Ağa arsa-i mahdûd-ı mezkûreyi ba‘de’t-tahliyeti’ş-şer‘iye ve’t-tekābuzü’l-mer‘î târih-i kitâbdan bir sene tamamına değin müvekkil-i merkūm Abdullah Efendi’ye seksen iki buçuk guruşa îcâr ve teslîm eyledikde ol dahi ber-vech-i muharrer istîcâr ve tesellüm ve kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Muharrem li-sene 1144. Şuhûdü’l-hâl: Şeyh Mehmed Efendi b. Mustafa, el-Hâc İsmail efendi b. Derviş el-imâm, Süleyman Efendi b. el-Hâc Receb, Ahmed Efendi b. Ali, Abdullah b. Abdullah.