Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 276 Hüküm no: 284 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer ve eşi Ayşe’nin tasarruflarındaki mülk evlerini Kara Mehmed vakfı mütevellisine istiğlâl yoluyla sattıkları İstiğlâl. Husûs-ı âti’l-beyânın mahâllinde ketb ve tahrîri için bi’l-iltimâs savb-ı şer‘-i enverden irsâl olunan Başkâtibimiz İmâmzâde Mustafa Efendi b. el-merhûm Yunus Efendi Debbağ tâifesinden olup bundan akdem vefât eden merhûm Kara el-Hâc Mehmed nâm sahibü’l-hayrın vakfına meşrûtiyyet üzere bi’l-fi‘il mütevellî olan el-Hâc Mustafa Efendi b. Hasan’ın mahmiye-i İstanbul’da el-Hâc Pîrî mahallesinde vâki‘ menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i şerîf ettikde mahmiye-i mezbûrede Sancakdâr Hayreddin mahallesi sâkinlerinden olup kendi nefsinden asîl ve zevcesi Âişe bt. Ahmed b. Abdullah nâm hatunun zevci ve tarafından husûs-ı âti’z-zikre vekîl olduğu zâtını ârifân Ahmed Ağa b. Mustafa ve Hüseyin Beşe b. Ahmed şehâdetleriyle sâbit olan el-Hâc Ömer b. Mustafa meclis-i ma‘kūd-ı mezkûrda bâ‘isü hâze’l-kitâb mütevellî-yi mezbûr el-Hâc Mustafa mahzarında bi’l-asâle ve bi’l-vekâle ikrâr ve takrîr-i kelâm edip ale’l-iştirâki’s-seviy yedimizde mülk ve hakkımız olup zikrolunan Sancakdâr Hayreddin mahallesinde vâki‘ bir tarafdan Kayyûm Mehmed Efendi ve bir tarafdan mahalle-i mezbûre müezzini menzilleri ve bir tarafdan Hattât Osman Efendi menzili ve bir tarafdan ba‘zen Hacı Kîsedâr vakfı ve ba‘zen tarîk-ı âm ile mahdûd ma‘lûmü’l-müştemilât mülk menzilimizi mütevellî-yi merkūm yedinden istidâne ve kabz ve mesârifimize sarfla istihlâk etmemiz ile vakf-ı mezbûra zimmetimizde edâsı lâzım deynimiz olan yetmiş guruş mukābelesinde bi-tarîkı’l-istiğlâl bey‘ ve teslîm ol dahi ber-vech-i muharrer iştirâ ve tesellüm ve kabz eylediğinden sonra mütevellî-yi mezbûr menzil-i mahdûd-ı mezkûru gıbbe’t-tahliyeti’ş-şer‘iye ve’t-takābuzü’l-mer‘î târih-i kitâbdan üç sene tamamına değin beher senesi on buçuk guruşdan cem‘an otuz bir buçuk guruşa bize îcâr ve teslîm biz dahi ber-vech-i muharrer istîcâr ve kabûl eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Muhzır Abdünnebi b. Nuh ve Çukadâr ( ) ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 7 min-Muharremi’l-harâm sene [1]144. Şuhûdü’l-hâl: Molla Mustafa b. el-Hâc Ali, Ömer Çelebi b. Hüseyin, Osman b. Halil, el-Hâc Ahmed b. el-Hâc İsmail, Seyyid b. Seyyid Mustafa, Hasan b. İbrahim, Molla Ahmed b. el-Hâc Mehmed, el-Hâc Mehmed Ağa b. el-Hâc Abdullah, Hasan Beşe b. İbrahim.