Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 277 Hüküm no: 285 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat Hacıisa mahallesinden Tüccâr Yasef’in Esirci Halil Beşe’de olan alacağı konusunda sulh olduğu Tüccâr tâifesinden olup mahmiye-i İstanbul’da Balatkapısı dâhilinde el-Hâc İsa mahallesinde sâkin Yasef v. Mordehay nâm Yahûdî meclis-i şer‘-i şerîf-i enverde Hâssa bostânîlerinden Ahmed Haseki b. Mustafa mübâşeretiyle meclis-i şer‘a ihzâr olunan Esirci tâifesinden bâ‘isü hâzihi’l-vesîka Halil Beşe b. Mustafa mahzarında ikrâr ve takrîr-i kelâm edip bundan akdem mezbûr Halil Beşe zimmetinde cihet-i karz-ı şer‘îden üç yüz guruş hakkım olmağla meblağ-ı mezbûru ve bi-gayr-ı hakkın yedimden ahz u kabz eylediği üç yüz otuz guruş kıymetli Gürciyyetü’l-asl bir re’s câriyem mevcûd ise aynını müstehlek ise ba‘de’s-sübût kıymet-i şer‘iyesini mezbûr Halil Beşe’den taleb ve da‘vâ eylediğimde ol dahi ba‘de’l-inkâr ben müdde‘âmı isbât sadedinde iken ba‘de vukū‘ı’l- münâza‘a [69a] beynimize muslihûn tavassut edip da‘vâ-yı mezkûremden beni mezûr Halil Beşe ile an-inkâr üç yüz beş guruş üzerine sulh ettiklerinde ben dahi sulh-ı mezbûru ba‘de’l-kabûl mezbûr Halil Beşe yedinde mülkü olup evsâfı beynimizde ma‘lûm Acemiyyü’l-asl bir re’s Ali nâm gulâmını yüz yirmi beş guruşa ve mahrûse-i Edirne’de Turgud Bâzergân mahallesinde vâki‘ bir tarafdan Ahmed Ağa menzili ve bir tarafdan Paşalı el-Hâc Mehmed menzili ve bir tarafdan Duhânî Ahmed Çelebi menzili ve bir tarafdan tarîk-ı âm ile mahdûd menzilden yüz altmış sehimden yedinde ber-mûceb-i hüccet mülkü olan yüz kırk altı sehim hisse-i şâyi‘asını cümle tevâbi‘ ve levâhıkıyla bana bey‘ ve temlîk ve mahâllinde kabz ve tesellüme taslît ve semenleri olan cem‘an üç yüz beş guruşu bâlâda mezkûr bedel-i sulh-ı mezbûra takās ve mahsûb eylediğinde ben dahi ber-vech-i muharrer iştirâ ve temellük ve tesellüm ve mukāssa ve kabûl eylediğimden sonra husûs-ı mezkûra müte‘allika âmme-i de‘âvî ve muhâsamât ve mutâlebâtdan her birimiz âharı ibrâ-i âmm-ı kātı‘u’n-nizâ‘la ibrâ ve ıskāt eyledik. Min-ba‘d husûs-ı mezkûra müte‘allika bir birimiz ile kat‘a da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Muharremi’l-harâm sene [1]144. Şuhûdü’l-hâl: Kapıcı Mahmud Ağa b. Ömer, Paşa Mehmed b. Ali, Kara Mustafa b. Hasan, Hüseyin b. Mehmed, İnce Mustafa b. Ali, Hasan Beşe b. Veli, Kafesdâr Halil Ağa.