Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 278 Hüküm no: 286 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devrek kasabasından Süleyman b. Yâsin’in hizmetinde iken eşyasına el koyduğu iddiasıyla Abdullah b. Ali tarafından açılan alacak davasının sulhla sonuçlandığı Sulh. Vilâyet-i Anadolu’da Devrek kasabası ahâlîsinden olup mahmiye-i İstanbul’da Peştemalcılar Hânı’nda müsâfiren Abdullah b. Ali nâm kimesne meclis-i şer‘-i şerîf-i enverde bâ‘isü hâze’l-kitâb Süleyman b. Yâsin nâm kimesne mahzarında ikrâr ve takrîr-i kelâm edip târih-i kitâbdan bir sene mukaddem mezbûr es-Seyyid Süleyman’ın hizmetinde iken kendi mâlımdan on beş guruş kıymetli bir çift tabancalı ve on beş guruş kıymetli bir Acem demiri kılıç ile nakd yirmi guruşu mezbûr es-Seyyid Süleyman bi-gayr-ı hakkın ahz u kabz etmekle zikrolunan tabancalı ve kılıcın aynıları mevcûd ise a‘yânın müstehleke ise ba‘de’s-sübût kıymetlerini meblağ-ı mezbûr yirmi guruşu mezbûr es-Seyyid Süleyman’dan taleb ve da‘vâ eylediğimde beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden beni mezbûr es-Seyyid Süleyman ile otuz beş guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz beş guruşu mezbûr es-Seyyid Süleyman yedinden ahz u kabz eylediğimden sonra husûs-ı mezkûra ve târih-i kitâba gelince sâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik. Ba‘de’l-yevm bir birimiz ile vechen mine’l-vücûh ve sebeben mine’l-esbâb kat‘a da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Muharremi’l-harâm sene [1]144. Şuhûdü’l-hâl: Mehmed b. Mehmed, Berber Mehmed b. Hasan, Gazzaz İsmail b. <> Hasan, el-Hâc Mehmed b. Mehmed, Ahmed b. Mehmed, Mehmed b. Berber Mustafa.