Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 294 Hüküm no: 422 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin bağ, bahçe ve mezraalarını sattığı Vilâyet-i Rumeli’nde Bosna eyâletinde Klis kazâsına tâbi‘ Sin kal‘ası ahâlîsinden olup mahmiye-i İstanbul’da merhûm Sultan Selim Câmi‘-i şerîfi kurbünde Debbağ Yunus Mahallesi’nde mütemekkin olan İbrahim Çelebi b. Mehmed mahfil-i kazâda işbu bâ‘isü’l-kitâb fahrü’l-emâsil ve’l-akrân Kasım Bey b. Hüseyin mahzarında ikrâr-ı tâm ve takrîr-i kelâm edip zikrolunan Sin kal‘ası kurbünde vâki‘ Brezenişli? Kutoğlu? nâm kimesneden iştirâ ve tefevvüz eylediğim lede’l-ahâlî ve’l-cîrân herbiri ma‘lûmü’l-hudûd olan harâbe müşrif ev yerleri ve müte‘addid bağ ve bağçeleri ve müte‘addid bostan yerleri ve çayırları ve mevâzi‘-i merkūmede vâki‘ tarlaları ve mezâri‘i ve koruyu ma‘rifet-i sâhib-i arzla mezbûr Kasım Bey’e tammü’l-vezn ve sahîhü’l-ayâr yedi yüz kıt‘a riyâlî guruşa bey‘ ve tefvîz edip ol dahi emlâk-i mezbûreyi iştirâ ve mezâri‘-i mezkûrları ve merâti‘-i merkūme ve koru ve örülerin hakk-ı tasarruflarını tefevvüz ve kabûl eyledikden sonra meblağ-ı mezbûr yedi yüz kıt‘a riyâlî guruşu merkūm Kasım Bey yedinden bi’t-tamam ve’l-kemâl ahz u kabz eyleyip emlâk-i mezbûreyi mahallinde tesellüme ve mezâri‘-i mezkûre ve merâti‘-i merkūme ve koru ve örüleri zabt ü sarfa mersûm Kasım Bey’i taslît eyledim min-ba‘d benim alâka ve medhalim kalmayıp emlâk-i mezbûre mülk-i müşterâsı ve mezâri‘-i mezkûre ve merâti‘-i merkūme ve koru ve örü dâhil-i taht-ı tasarrufu olmuşdur, keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Ramazani’l-mübârek li-sene erba‘a ve sittin ve elf. Şuhûdü’l-hâl: Eş-şeyh Mehmed Efendi b. Musa, İbrahim Çelebi b. Davud, Mehmed Çelebi b. Hüseyin çukadâr, Pîrî [b.] Hüseyin, Mehmed Çelebi b. Hüseyin ve gayruhum.