Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 278 Hüküm no: 287 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belen kazasından mütevellî Hasan Ağa’da olan alacağını tahsili için Seyyid Mehmed Çelebi’nin vekil tayin edildiği Fi’l-asl vilâyet-i Anadolu’da Belen kazâsı ahâlîsinden olup hâlâ mahmiye-i İstanbul’da Fazlı Paşa Sarayı’nda müsâfiren sâkin el-Hâc Fethullah Efendi b. el-Hâc Mehmed Ağa b. el-Hâc Yusuf nâm kimesne meclis-i şer‘-i şerîf-i enverde işbu bâ‘isü’l-vesîka es-Seyyid Mehmed Çelebi b. es-Seyyid Ramazan nâm kimesne muvâcehesinde ikrâr ve takrîr-i kelâm edip kazâ-i mezbûr ahâlîsinden gāib ani’l-meclis mütevellî Hasan Ağa b. Yusuf nâm kimesne zimmetinde cihet-i deyn-i şer‘îden beynimizde ma‘lûmü’l-mikdâr hakkım olup meblağ-ı mezbûru merkūm Hasan Ağa’dan taleb ve da‘vâ ve ahz u kabz ve bana îsâl ve teslîme işbu es-Seyyid Mehmed Çelebi’yi tarafımdan vekîl ve nâib-i menâb nasb ve ta‘yîn eylediğimde ol dahi kabûl ve ber-vech-i muharrer merâsimini edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Muharrem sene [1]144. Şuhûdü’l-hâl: es-Seyyid Ebûbekir Efendi b. es-Seyyid Abdullah, Yusuf Ağa b. Bayram mütevellî-yi sâbık, es-Seyyid Mustafa Efendi b. Mehmed Efendi, İbrahim Efendi b. Molla Musa, Hüseyin Çelebi b. Abdullah, İbrahim Efendi b. Ahmed Çelebi, Mustafa Efendi b. Ahmed, es-Seyyid Feyzullah Efendi b. Ahmed.