Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 279 Hüküm no: 288 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband Osman’ın karısı ve vârisi olan Hadîce Hatun tarafından açılan alacak davasının reddedildiği Mahmiye-i İstanbul’da Dülbendci Hüsam mahallesi sükkânından iken bundan akdem [vefât] eden Na‘lbend Osman b. Abdullah’ın zevce-i metrûkesi kendi nefsinden asîl ve sulbî oğlu Seyyid Ali ve sulbiye kızı Şerîfe Emine nâm sagīrlerin tesviye-i emirlerine kıbel-i şer‘den mansûbe vasîsi olan vâlideleri Şerîfe Hadîce Hatun bt. Ali Efendi meclis-i şer‘-i şerîf-i enverde işbu sahibü’l-kitâb Na‘lbend Mehmed b. Mehmed nâm kimesne mahzarında bi’l-asâle ve bi’l-vesâye üzerine da‘vâ ve takrîr-i kelâm edip zevcim müteveffâ-yı mezbûr Osman ile mezbûr Mehmed na‘lbandlık san‘atında şerîkler olup mal-ı şirketden sâbıkā sadrazam kethudâsı müteveffâ Mehmed Paşa zimmetinde na‘l bahâsından yüz guruş haklarını mezbûr Mehmed müteveffâ-yı mezbûrun terekesinden ahz u kabz etmeğin meblağ-ı mezbûrun nısfı olan elli guruş mûrisimiz müteveffâ-yı mezbûrun terekesinden olmağla mezbûr Mehmed’e suâl olunup meblağ-ı mezbûr elli guruşu bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyine beyyine taleb olundukda ityân-ı beyyineden izhâr-ı aczile istihlâf etmeğin fi’l-hakīka müdde‘iye-i mezbûrenin mûrisi müteveffâ-yı mezbûrun terekesinden elli guruşunu ahz u kabz etmeyip ol vechile üzerine redd ü damândan nesne lâzım gelmediğine mezbûr Na‘lband Mehmed’e yemîn teklîf olundukda ol dahi alâ-vefki’s-suâl yemîn billâhi’l-aliyyü’l-a‘lâ etmeğin mûcebince müdde‘iye-i mezbûre bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: es-Seyyid Halil b. Veli, Kethudâ Mehmed Çelebi b. Ahmed, Mehmed b. el-Hâc İsa, Yakub Çelebi b. İshak.