Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 280 Hüküm no: 289 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun’dan vârislerine kalan arsanın ölçümünün yapılarak taksim edildiği Keşşâf. Husûs-ı âti’z-zikrin mahâllinde ketb ve tahrîri için savb-ı şer‘den irsâl olunan keşf nâibi Mevlânâ Mustafa Efendi b. Ali [ve] Hâssa mi‘mârlarından Ali Halîfe b. Ahmed ve el-Hâc Mehmed Halîfe b. Ahmed ile mahmiye-i İstanbul’da Samatyakapısı dâhilinde el-Hâc Hasan mahallesinde vâki‘ bir tarafdan Mustafa Ağa menzili ve bir tarafı diğer Mustafa Haseki menzili ve bir tarafı Mehmed Ağa menzili ve bir tarafı tarîk-ı âm ile mahdûd muhterik arsaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm eyledikde mahalle-i mezbûre sâkinlerinden olup bundan akdem müteveffiye olan Emetullah bt. Mehmed b. Abdullah’ın verâseti sadrı kebîr oğlu Mehmed Ağa ile sadriye kebîre kızları Ümmügülsüm ve Âişe’ye münhasıra tashîh-i mes‘eslesi dört sehimden olup sihâm-ı mezbûreden iki sehmi mezbûr Mehmed Ağa’ya ve birer sehmi Ümmügülsüm ve Âişe’den her birine isâbet eylediği zâhir ve mütehakkık oldukdan sonra mezbûrûn Mehmed Ağa ve Ümmügülsüm ve Âişe zâtları ba‘de’t-ta‘rîfi’ş-şer‘î meclis-i ma‘kūd-ı mezbûrda takrîr-i kelâm ve ta‘bîr ani’l-merâm edip mârrü’z-zikr arsa anamız mezbûre Emetullah’dan müntakil mülk-i mevrûsumuz olup kābil-i taksîm ve her birimiz için intifâ‘ mümkün olmağla rızâlarımız ile arsa-i mezkûre ba‘de’l-keşfi’l-mesâha her birimizin hisse-i irsiye-i şer‘iyesi ifrâz ve alâmât-ı fâsıla ile mümtâz olunmak matlûbumuzdur dediklerinde hâl bast olunan minvâl üzere olmağın mi‘mârân mezbûrân vesâir ehl-i vukūf re’y ve mübâşeretleriyle mesâha olundukda tûlen elli yedi ve arzen on dokuz be-hesâb-ı terbî‘î bin yetmiş üç zirâ‘a bâliğ olup bir tarafı Mustafa Ağa menzili ve bir tarafı Mustafa Haseki menzili ve bir tarafı kız karındaşı mezbûre Ümmügülsüm’e ta‘yîn ve tahsîs olunan arsa ve bir tarafı tarîk-ı âm ile mahdûd tûlen elli yedi ve arzen dört ve on sekiz parmak be-hesâb-ı terbî‘î iki yüz altmış dokuz buçuk zirâ‘ arsa mezbûre Âişe’nin rub‘ hissesine ta‘yîn ve tahsîs ve yine bir tarafı Mustafa Ağa menzili ve bir tarafı mezbûre Âişe’nin hissesine isâbet eden arsa-i mezkûre ve bir tarafı karındaşı mezbûr Mehmed Ağa’nın hissesine ta‘yîn ve tahsîs olunan arsa ve bir tarafı tarîk-ı âm ile mahdûd tûlen elli yedi ve arzen dört ve on sekiz parmak be-hesâb-ı mezkûr iki yüz altmış dokuz buçuk zirâ‘ arsa mezbûre Ümmügülsüm’ün rub‘ hissesine ta‘yîn ve tahsîs ve kezâlik bir tarafı Mustafa menzili ve bir tarafı mezbûre Ümmügülsüm’ün hissesine ta‘yîn olunan arsa ve bir tarafı mezbûr Mehmed Ağa’nın âhar menzili ve bir tarafı tarîk-ı âm ile mahdûd tûlen elli yedi ve arzen dokuz buçuk be-hesâb-ı terbî‘î beş yüz otuz dokuz zirâ‘ arsa mezbûr Mehmed Ağa’nın iki sehim hissesine ta‘yîn ve tahsîs olunup ve her biri kapıların tarîk-ı âm üzerine açmak üzere rızâlarıyla her biri hisselerine isâbet eden arsayı ahz u kabz ve kabûl ve üç kulaç bir bi’r-i mâ Mehmed Ağa’nın hissesine ta‘yîn olunan arsada vâki‘ olmağla mi‘mârân-ı mezbûrân takvîmi üzere bin iki yüz akçeden mezbûretân Ümmügülsüm ve Âişe’ye isâbet eden üçer yüz akçeyi karındaşları mezbûr Mehmed Ağa yedinden tamamen ba‘de’l-ahz beynlerinde alâmât-ı fâsıla vaz‘-ı eylediklerini mevlânâ-yı mezbûr mahâllinde ketb ve tahrîr [70a] ba‘de ma‘an ba‘s Çukadâr Ahmed ve Muhzır Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-şehri Zilhicce sene [1]143. Şuhûdü’l-hâl: Ahmed Efendi b. Es‘ad, Mehmed Efendi b. Ahmed el-imâm, İsmail Çelebi b. Mustafa müezzin, Berber Ali Çelebi b. el-Hâc Ahmed, Osman Çelebi b. Mehmed, Mehmed Beşe b. Mustafa, Molla Hasan b. Mustafa, Mustafa b. Abdullah.