Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 281 Hüküm no: 290 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Takyeci mahallesinden Mecnûn Mehmed’in terekesi için diğer vârisleri tarafından karısı Ümmügülsüm’e açılan davanın sulhla sonuçlandığı <> Medîne-i Üsküdar’da Takyeci mahallesinde sâkin iken bundan akdem vefât eden Mecnûn Mehmed b. Uncu el-Hâc İbrahim’in verâseti zevce-i metrûkesi Ümmügülsüm bt. Ahmed ile vâlidesi Hadîce bt. Bayram ve karındaşı Âişe’ye münhasıra ve tashîh-i mes’elesi bi-tarîkı’l-adl on üç sehimden olup sihâm-ı mezbûreden üç sehmi zevcesi mezbûre Ümmügülsüm’e ve dört sehmi mezbûre Hadice’ye ve altı sehmi mezbûre Âişe’ye isâbeti tahakkukundan sonra mezbûretân Hadîce ve Âişe nâm hatunlar ta‘rîfü’ş-şer‘î ile mu‘arrefe oldukları hâlde meclis-i şer‘-i hatîr-i lâzımü’t-tevkīrde müteveffâ-yı mezbûrun terekesine vâzı‘atü’l-yed olan zevcesi bâ‘isetü hâze’l-kitâb mezbûre Ümmügülsüm mahzarında her biri ikrâr-ı tâm ve takrîr-i kelâm edip müteveffâ-yı mezbûrun terekesinden olup mahmiye-i İstanbul’da Edirnekapısı kurbünde Hadîce Sultan mahallesinde vâki‘ lede’l-ahâlî ve’l-cîrân ma‘lûmü’l-hudûd muhterik mülk menzil arsasını ba‘de’l-müzâyede semen-i misli mütekarrir olduğu yüz altmış iki guruşdan bizim hissemize isâbet eden on dört bin dokuz yüz elli akçe hisse-i irsiyemizi mezbûre Ümmügülsüm’den taleb ve da‘vâ eylediğimizde ol dahi ber-mûceb-i hüccet mecnûn-ı mezbûrun umûruna sarf eylediğim yüz otuz iki guruş mecnûn-ı mezbûr zimmetinde otuz üç guruş bir sülüs guruş mehrim ve techîz ve tekfînine masrûfum olan on iki guruş min-haysü’l-mecmû‘ yüz yetmiş yedi guruş bir sülüs guruş hakkım vardır deyü meblağ-ı mezbûru da‘vâ ve ba‘de’n-nizâ‘ beynimize muslihûn tavassut edip hisse-i mezkûremiz da‘vâsından mezbûre Ümmügülsüm ile bizi kırk guruş üzerine sulh eylediklerinde biz dahi sulh-ı mezbûru ba‘de’l-kabûl bedel-i sulh olan meblağ-ı mezkûr kırk guruşu zevce-i mezbûre Ümmügülsüm yedinden tamamen ahz u kabz eylediğimzden sonra târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûle ve husûs-ı mezkûra müte‘allika âmme-i de‘âvî ve mutâlebât ve eymân ve muhâsamâtdan mezbûre Ümmügülsüm’ün zimmetini ibrâ ve ıskāt eylediğimizde ol dahi medfû‘u olan bedel-i mezkûr kırk guruş da‘vâsından bizim zimmetimizi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: <> Suyolcu Mehmed Ağa b. el-Hâc Mustafa, Süleyman Çelebi b. el-Hâc Ahmed, Dellâl Osman Ağa b. İbrahim, İbrahim Çelebi b. İsmail, Ahmed Çelebi b. Mehmed, Ali Çelebi b. Abdullah, Mustafa Çelebi b. Hasan Urfalı, Mehmed Çelebi b. Abdullah tahtacı, Ahmed b. Hasan.