Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 282 Hüküm no: 291 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Sultan vakfından olup mütevellî izni olmadan kiralanan evin yanması sonucu verilen paranın geri talep edilmesi Mahmiye-i İstanbul’da Beyceğiz mahallesinde sâkine bâ‘isetü hâze’l-kitâb Fâtıma bt. Ahmed nâm hatun meclis-i şer‘-i şerîf-i enverde Ali b. Osman nâm kimesne mahzarında üzerine da‘vâ ve takrîr-i kelâm edip mezbûr Ali târih-i kitâbdan iki sene mukaddem mahmiye-i mezbûrede Beyceğiz mahallesinde vâki‘ Fâtıma Sultan vakfından olup Hâdimağa odaları demekle ma‘rûf odada lede’l-ahâlî ve’l-cîrân ma‘lûmü’l-hudûd bir bâblı bilâ-izn-i mütevellî yetmiş guruş bedel mukābelesinde bana ferâğ ve tefvîz ve bedel-i mezkûrun altmış üç guruşunu yedimden ahz ben dahi tefevvüz ve kabz ve kabûl edip zikrolunan oda bir ay tasarrufumda iken bi-emrillâhi te‘âlâ ihrâk-ı kebîrde muhterik olmağla meblağ-ı mezkûru izn-i mütevellî bulunmamağla bedel-i mezkûrun yirmi beş guruşuna arsa-i mezkûru bâ-ma‘rifet-i mütevellî bana ferâğ ben dahi ba‘de’l-kabûl bâkī otuz sekiz guruşdan otuz üç guruş ile otuz beş palesini [parasını] yedinden ahz u kabz edip dört guruş beş palesini [parasını] yedinden ahz u kabz edip dört guruş beş pale [para] zimmetinde bâkī kalmağla mezbûr Ali’ye suâl olunup meblağ-ı bâkī-i mezbûru bana edâya tenbîh olunması matlûbumdur dedikde gıbbe’s-suâl mezbûr Ali cevâbında meblağ-ı bâkī-i mezbûru dahi müdde‘iye-i mezbûreye edâ ve teslîm ol dahi yedinden ahz u kabz eyledi deyü def‘ edicek gıbbe’l-istintâk ve’l-inkâr mezbûr Ali’den def‘-i meşrûhuna beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka meblağ[-ı mezbûr] dört guruş beş pâyeyi [parayı] dahi mezbûr Ali yedinden ahz u kabz etmediğine mezbûre Fâtıma’ya yemîn teklîf olundukda ol dahi hasbe’l-mesûl yemîn billâhi’l-aliyyü’l-a‘lâ etmeğin mûcebince ba‘de’t-tenbîh mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene erba‘a ve erba‘în mie ve elf. Şuhûdü’l-hâl: İbrahim Çelebi b. Mustafa, Mehmed Çelebi b. Receb, Abdullah Çelebi b. Mustafa, Hüseyin Çelebi b. Mustafa Mehmed Çelebi b. Abdullah ve gayruhum.