Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 291 Hüküm no: 311 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osmancık’ta Koca Mehmed Paşa vakfı mütevellî kaymakamı Ali’nin tasarrufuna vakıf görevlisi Ömer’in ve diğerlerinin müdâhale etmemesi Ma‘rûz. Arzuhâl eden Ali derûn-ı arzuhâlde mastûrü’l-ism olup Dîvân-ı âlîlerine ihzâr olunan Ömer Efendi mahzarında nezâret-i hazret-i a‘zamîde olan evkāfdan Osmancık’da vâki‘ Koca Mehmed Paşa vakfına evlâdiyet ve meşrûtiyyet üzere mütevellî olan es-Seyyid Salih Çelebi bin yüz kırk senesi Martı ibtidâsından üç sene zabteylemek üzere bir tahvîl ile beni kāimmakām-ı mütevellî nasb ve vakıf karyelerin iltizâm ben dahi kabûl ve mâlımdan taraf-ı vakfa ma‘lûmü’l-mikdâr akçem geçip ancak bir sene zabtedip henüz akçemi istifâ etmiş değil iken mezbûr Salih Çelebi tevliyeti karındaşı es-Seyyid Süleyman’a kasr-ı yed etmekle mezbûr es-Seyyid Süleyman mezbûr Ömer’i kāimmakām-ı mütevellî nasb ol dahi tarafından gāib ani’l-meclis Tüfenkci Ahmed nâm kimesneyi vekîl etmekle ahvâlimi Çorum sancağı beyi Kahraman Mehmed Paşa ve Hacı Hamza ve kādısı es-Seyyid Ahmed Efendi başka başka arz etmeleriyle yedimde olan temessük ve fermân-ı âlî ve hüccet-i şer‘iyeler mûceblerince mütevellî-yi merkūm es-Seyyid Salih’e verdiğim akçem tamamen edâ olunmadıkca gerek es-Seyyid Salih ve gerek es-Seyyid Süleyman ve gerek Ömer ve âhardan bir ferd müdâhale ve zabtına mümâna‘at etmeyip ben zabteylemek üzere yedime işbu emr-i âlîşân ihsân olunmişiken merkūm Ömer müdâhele ve mu‘ârazadan hâlî olmamağla yedimde olan emr-i şerîf-i âlişâna nazar ve mûcebince mu‘ârazası men‘ olunmak murâdımdır deyü yedinde takrîrini nâtık olan emr-i şerîfi ibrâz eyledikde mezbûr Ömer dahi itâ‘at-ı emr-i âlî edip min-ba‘d tevliyet-i merkūme kāimmakāmlığına ve vakıf karyelerine müdâhale etmemek üzere ta‘ahhüd etmekle mezbûr Ali mûcebince emr-i âlî iltimâs eder müsâ‘ade buyurulursa ol bâbda fermân hazret-i veliyyü’l-emrindir. Fî 3 Zilhicce sene [1]143