Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 297 Hüküm no: 326 Orijinal metin no: [74a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola’nın Yorgancı Mehmed’de alacağı olduğu Ma‘rûz. Sahib-i arzuhâl Nikola zimmî meclis-i şer‘de hasmı Yorganî el-Hâc Mehmed muvâcehesinde târih-i i‘lâmdan yüz on yedi gün mukaddem ber-mûceb-i temessük cihet-i karz ve yedimden müşterâ ve makbûz eşyâ-i ma‘lûme semenlerinden mezbûr el-Hâc Mehmed zimmetinde hakkım olan yedi yüz altmış bir guruşun kırk guruşunu yedinden ba‘de’l-kabz bâkī kalan yedi yüz yirmi bir guruşun nısfı olan üç yüz altmış buçuk guruşu târih-i mezkûrdan doksan bir gün tamamında bana edâ etmek üzere mezbûr el-Hâc Mehmed’i tecîl eylediğimde ol dahi ba‘de’l-kabûl ecel-i mezkûr hulûl etmeğin meblağ-ı mezbûr üç yüz altmış buçuk guruşu ve mâ‘adâ üç yüz altmış buçuk guruşu ba‘de tamami’l-müdde taleb ederim deyü da‘vâ ol dahi ikrâr ve i‘tirâf etmeğin mûcebince tenbîh olunduğu mübâşirleri Mustafa Çavuş iltimâsıyla huzûr-ı âlîlerine i‘lâm olundu. Fî 8 Zilhicce sene [1]143.