Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 301 Hüküm no: 336 Orijinal metin no: [75a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ankaralı on zimminin görevlilerce kendilerinin cezalandırılmasına sebep olan İstanos köyünden Papasoğlu Arslan’dan şikayetleri Ma‘rûz. Ashâb-ı arzuhâl medîne-i Ankara ahâlîsinden Artin v. Markar ve Karabet v. Marat ve Sergiz v. Agop ve Abraham v. Avak ve Avanis v. Sergiz vesâir cerîdede isimleri mastûr on nefer zimmîler meclis-i şer‘de yine medîne-i mezbûre kurâlarından İstanos karyesi mütemekkinlerinden derûn-ı arzuhâlde mezkûrü’l-ism Papasoğlu Arslan v. Kirkor zimmî muvâcehesinde mezbûr Arslan her birimiz üzerlerine edâsı lâzım gelen tekâlîf-i örfiyelerimizi edâda ta‘allül ve muhâlefetimiz yoğiken mezbûr Arslan kendi hâlinde olmayıp garaz-ı fâsidine binâen kurâ zâbitleri vesâir ehl-i örf tâifesi yanlarına varıp gamzıyla her birimizi bi-gayr-ı hakkın tecrîm ettirip mezbûrun te‘addîsinden nâşî beynimizde ihtilâle bâ‘is ve karyemizin harâbına sebeb olmağla mesfûr zimmîden [75b] bir vechile emniyet ve rahatımız yokdur deyü her biri teşekkî edip fi’l-hakīka mezbûr Arslan’ın ber-vech-i muharrer sû’-i hâlini ehl-i vukūfdan ma‘lûmü’l-esâmî on beş nefer re‘âyâ dahi ihbâr etmeğin bu makūlelerin re’y ve tedîbi bâbında emr ü fermân inâyetlü sultânım hazretlerinindir. Fî 17 Zilhicce sene [1]143.