Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 302 Hüküm no: 338 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccâr Hüseyin’in birçok kişiye borçlu olmasından dolayı borçlarının taksitlendirildiği Ma‘rûz. Tüccâr tâifesinden sahib-i arzuhâl Hüseyin’in eşyâ-i ma‘lûme semenlerinden es-Seyyid Ahmed Çelebi’ye <> yedi yüz altmış bir guruş ve İbrahim Çelebi nâm kimesneye iki yüz yirmi guruş ve es-Seyyid Mustafa Çelebi iki yüz seksen guruş ve Hasan Çelebi nâm kimesneye pirinç ve ketân bahâlarından yüz elli guruş cem‘an bin dört yüz on bir guruş zimmetinde edâsı lâzım deyni olduğu lede’ş-şer‘i’l-enver sâbit ve müte‘ayyin olup bâ-fermân-ı âlî ahvâli tefahhus olundukda fi’l-hakīka mezbûr Hüseyin düyûn-ı mezkûreden mâ‘adâ düyûn-ı kesîreye mübtelâ olup def‘aten edâ-i deyne bir vechile iktidârı olmadığını ahâlî-i mahallesinden dokuz nefer ma‘lûmü’l-esâmî Müslimîn meclis-i şer‘de ihbâr ve mezbûrûn dâyinler dahi i‘tirâf ettiklerinden sonra beher şehr kendilere guruş başına bir akçe verip düyûn-ı mezkûreyi târih-i i‘lâmdan yüz iki ay tamamına değin edâ etmek üzere her biri taksît ve tecîl eyledikde mezbûr Hüseyin dahi kabûl ve düyûn-ı mezkûreyi ber-vech-i muharrer edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 19 Zilhicce sene [1]143.