Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 68 Hüküm no: 61 Orijinal metin no: [12a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın kocası Halil Beşe’den muhalaa yoluyla boşandığı Medîne-i Üsküdar’a muzâfe Adalar nâhiyesine tâbi‘ Kartal kasabasında sâkine olup zâtı vech-i şer‘î üzere mu‘arrefe olan Âişe bt. el-Hâc İbrahim Efendi nâm hatun meclis-i şer‘-i hatîr-i lâzimü’t-tevkīrde işbu bâ‘isü’l-vesîka Halil Beşe b. Hüseyin mahzarında bi-nefsihâ ikrâr ve takrîr-i kelâm edüp mezbûr Halil Beşe zevc-i dâhilim olup beynimizde hüsn-i zindegân ve imtizâcımız olmayup ben hul‘a tâlibe ve mufârakate rağıbe olduğum ecilden zimmetinde mütekarrir ve ma‘kūdün-aleyh olan on iki bin altı yüz akçe mehr-i müeccelim ve nafaka-i iddet-i ma‘lûmem üzerine ve me’ûnet-i süknâm dahi kendü üzerime olmak üzere zevcim mezbûr ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl zevciyet kā’im iken mezbûr Halil Beşe târîh-i kitâba gelince üç sene benim bağ ve bostan ve tarlalarım hâsıl ve îrâdlarından ba‘de’l-harc ve’l-mesârif üç yüz guruş ve vişne bey‘ edüp elli guruş ve yedimden cebren alıp kendüne kürk aldır deyü kırk guruş ki cem‘an üç yüz doksan guruş hakkımı taleb ve da‘vâ eylediğimde ol dahi meblağ-ı mezkûrdan kırk iki guruşu Mehmed Ağa’ya def‘e yedi guruşunu ve Yağlıkçı Hasan Ağa’ya elli beş guruşunu ve kadına? kırk guruşu ve Kalaycı Veli Beşe zevcesine dokuz guruş cem‘an yüz elli üç guruş deynimi emrim ile her birine ba‘de’l-edâ meblağ-ı bâkī-i mezkûrun mutâlebesine ve’l-hâsıl hukūk-ı zevciyete ve sâir ahz ü i‘tâya müte‘allıka âmme-i de‘âvî ve kâffe-i mutâlebât ve eymân-ı muhâsamâtdan ehadühümâ âharın zimmetini ibrâ-i âm ile ibrâ ve iskāt edüp her birimiz âharın ibrâsını ba‘de’l-kabûl fîmâ-ba‘d mezbûr Halil Beşe kıbelinde benim içün vechen mine’l-vücûh hak ve alâkam kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min-Şa‘bâni’l-mu‘azzam li-sene tis‘a ve seb‘în ve mi’ete ve elf. Şuhûdü’l-hâl: el-Hâc Mustafa Ağa, Hüseyin Ağa, Ahmed Ağa, Kayseriyeli Mehmed, Serdâr Mehmed, Hasan Usta, İbrahim Edhem, Nalband İbrahim Beşe, Nalband Halil Beşe, Hancı? Derviş Halil Beşe, es-Seyyid Murtaza, Halil b. İbrahim.