Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 298 Hüküm no: 428 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mahmud Çelebi’nin terekesinden vârislerden Ayşe ve Ahmed Çelebi’nin haklarını aldıkları Vilâyet-i Anadolu’da kasaba-i Rize ahâlîsinden olup bundan akdem Mahrûse-i İstanbul’da vefât eden Mahmud Çelebi b. Sinan’ın verâseti zevcesi Âişe bt. el-Hâc Ali nâm hatun ve li-ebeveyn er karındaşı Ahmed Çelebi’ye ve li-ebeveyn kız karındaşı diğer Âişe’ye münhasıra olup kable’l-kısmet mezbûre Âişe dahi müteveffât olup verâseti vâlidesi Nisa Hatun bt. Ahmed’e ve babası mezbûr el-Hâc Ali’ye münhasıra olup muhallefâtının bi-hükmi’l-münâsaha on iki sehmden altı sehmi mezbûr Ahmed Çelebi’ye ve üç sehmi mezbûre Âişe’ye ve bir sehmi mezbûre Nisa Hatun’a ve iki sehmi mezbûr el-Hâc Ali’ye isâbet eylediği şer‘an müte‘ayyen oldukdan sonra mezbûr Ahmed Çelebi asâleten ve mezbûre diğer Âişe tarafından vekâlet iddi‘â etmekle vekâleten mahfil-i kazâda müteveffâ-i mezbûrun muhallefâtına vâzı‘u’l-yed olan işbu bâ‘isü’l-kitâb mezkûr el-Hâc Ali mahzarında ikrâr ve takrîr-i kelâm edip mûrisimiz müteveffâ-i evvel merkūm Mahmud’un muhallefâtından sihâm-ı mezbûreden müvekkileme isâbet eden hakkımız mukābelesinde merkūm el-Hâc Ali yedinden neftî çukaya kaplı bir sincab kürk ve bir şarabî çuka ve bir yeşil atlas kaftan ve bir Mısır alacası kaftan ve bir kırmızı muhattem kuşak ve bir kırmızı kemha çintiyân ve bir dülbend ve bir kırmızı çakşır ve bir sim kabzalı hançer ve bir sim bıçak ve iki köhne kavuk ve bir beyâz anteri ve iki re’s gulâm ve yüz elli guruş kıymetli bir harpone? tâ‘bir olunur sefîne ve bir def‘a üç yüz riyâlî guruş ve bir def‘a iki yüz riyâlî guruş asâleten ve vekâleten ahz u kabz eyleyip mezbûr el-Hâc Ali’nin zimmetini müteveffâ-i mezbûrun muhallefâtına müte‘allık de‘âvî ve mutâlebât ve eymân ve muhâsamâtdan ibrâ-i âmm-ı kātı‘u’n-nizâ‘ ile ibrâ ve ıskāt-ı tamm-ı râfi‘u’l-hısâm ile ıskāt eyledim min-ba‘d benim ve müvekkile-i mezbûrenin müteveffâ-i mezbûrun muhallefatına müte‘allık mezbûr el-Hâc Ali ile vechen mine’l-vücûh ve sebeben mine’l-esbâb da‘vâ ve nizâ‘ımız yokdur, eğer bir tarîk ile benden ve müvekkile-i mezbûreden merkūm el-Hâc Ali üzerine da‘vâ sudûr ederse lede’l-hükkâmi’l-kirâm istimâ‘ ve ısgā olunmaya dedikde gıbbe’t-tasdîkı’l-mu‘teber mezbûr el-Hâc Ali ve merkūm Ahmed Çelebi’ye eğerçi sen vekîlsen lâkin ben emîn değilim mezbûre diğer Âişe vekâleti inkâr edip hakkını sâniyen benden ahz eyledikde sen kefîl olur musun deyicek merkūm Ahmed Çelebi dahi dâmin olmağın mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min-şehri Ramazani’l-mübârek li-sene erba‘a ve sittin ve elf. Şuhûdü’l-hâl: Mustafa Bey b. Mehmed el-mübâşir, diğer Mustafa Bey [b.] Mehmed el-mübâşir, Ahmed Bey b. Süleyman el-mübâşir, <> el-Hâc Mehmed b. Yusuf, Mustafa Beşe b. Abdullah, Mustafa Beşe b. Yusuf, el-Hâc Ali b. Ahmed, Mahmud Beşe b. Derviş, el-Hâc Mehmed Çelebi b. Receb, el-Hâc Yahya b. Abdurrahman, el-Hâc Mustafa ve gayruhum.