Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 313 Hüküm no: 367 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşve Yahudi’nin Mosi’den alacağı olduğu Ma‘rûz. Sahib-i arzuhâl Yaşve nâm Yahûdî meclis-i şer‘de derûn-ı arzuhâlde mezkûrü’l-ism Mosi nâm Yahûdî muvâcehesinde bundan akdem merkūm Mosi Yahûdî zimmetinde yedimden müşterâ ve makbûz ustura ve bıçak vesâir hurdevât bahâsından ba‘de küllî hesâb yüz altmış guruş hakkım olmağla târih-i i‘lâm günü ale’s-seher şuhûd mahzarında ikrâr ve işhâd etmişidi. Hâlâ taleb ederim deyü ba‘de’d-da‘vâ ve’l-inkâr müdde‘î-yi mezbûr ber-vech-i muharrer müdde‘âsını merkūm Mosi Yahûdî muvâcehesinde lede’t-tezkiye <> İlya v. Liyazer ve Matite v. Sebeta ve Feraş v. Yasef ve Rafeil v. Salamon nâm Yahûdiler ile vech-i şer‘î üzere isbât etmeğin mûcebince meblağ-ı mezbûr yüz altmış guruşu müdde‘î-yi merkūm Yaşve Yahûdî’ye edâ ve teslîme mezbûr Mosi Yahûdî’ye tenbîh olunduğu huzûr-ı âlîlerine i‘lâm olundu. Fî-gurreti Muharrem sene [1]144.