Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 318 Hüküm no: 380 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri Cani’ye kefil olan Mosi’nin alacaklı Petro’ya bu parayı ödemesi Sahib-i arzuhâl Petro zimmî hasmı Mosi Kavala nâm Yahûdî ile bundan akdem mürâfa‘a olduklarında mezbûr Petro gāib ani’l-meclis Dimitri Cani zimmetinde pirinç bahâsından hakkı olan beş yüz kırk bir guruşu taleb ve da‘vâ eyledikde “meblağ-ı mezbûr bende ve zimmetimdedir benden al” deyü şuhûd mahzarında mezbûr Mosi ikrâr ve i‘tirâf etmişdir taleb ederim deyü da‘vâ ol dahi cevâbında müdde‘î-yi mezbûr bundan akdem benimle Mahmud Paşa Mahkemesi’nde mürâfa‘a oldukda yedinde olan i‘lâm nâtık olduğu üzere ben vereyim deyü va‘dime binâen meblağ-ı mezbûru benden da‘vâ ve mu‘ârazadan men‘ olunmuşidi deyip ibrâz eylediği i‘lâmı isbât için talebiyle imhâl olunup müddet-i mehil münkaziye ve zikrolunan i‘lâm mazmûnunu isbâtdan izhâr-ı acz etmeğin müdde‘î-yi mezbûr müdde‘âsını tüccâr-ı Mısır’dan el-Hâc Hasan b. Abdullah ve beş nefer ma‘lûmü’l-esâmî ehl-i zimmet ile isbât ve şâhidleri ta‘dîl ve tezkiye olundukda her biri makbûlü’ş-şehâde oldukları müte‘ayyin olmağın mûcebince meblağ-ı mezbûr beş yüz kırk bir guruşu müdde‘î-yi mezbûra edâ ve teslîme mezbûr Mosi’ye tenbîh olunduğu huzûr-ı âlîlerine i‘lâm olundu. Fî 7 Muharrem sene [1]144.