Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 319 Hüküm no: 382 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi’nin Mehmed Beşe’ye açtığı alacak davasının zaman aşımından reddedildiği Ma‘rûz. Sahib-i arzuhâl Mosi nâm Yahûdî hasmı Kapıkethudâsı Mehmed Beşe mübâşeretiyle meclis-i şer‘a ihzâr eylediği Mehmed Beşe’den mezbûr Mehmed Beşe’ye yirmi sene mukaddem hırfet-i mezbûre âlâtından bir çift kürek ve kebîr kazgan ve bir nühâs kefçemi ve beynimizde ma‘lûmü’l-mikdâr mîzân ve derâhim ve örs ve çekicimi safka-i vâhide ile on dokuz bin akçeye bey‘ edip meblağ-ı mezbûrun iki bin akçesini yedinden ahz ve zimmetinde on yedi bin akçe bâkī kalmağla meblağ-ı bâkī-i mezbûru mezbûr Mehmed’den taleb ederim deyü da‘vâ eylediğimde müdde‘î-yi mezbûrun takrîr-i meşrûhu üzere bilâ-özr-i şer‘î on beş sene terk olunan da‘vânın bilâ-emr istimâ‘ı meşrû‘ olmamağla müdde‘î-yi mezbûr Mosi bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 7 min-Muharrem sene [1]144.