Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 326 Hüküm no: 401 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe ile karısı Emine‘nin boşandıkları Ahz u kabz. Mahmiye-i İstanbul’da Kırkçeşme kurbünde ( ) mahallesi sâkinelerinden olup zâtı mahalle-i mezbûre ahâlîsinden Mehmed Çelebi b. Ahmed ve Mustafa Çelebi b. Ali nâm kimesneler ta‘rîfleriyle mu‘arrefe olan Emine bt. Mahmud nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka Ali Beşe b. İsmail muvâcehesinde ikrâr ve takrîr-i kelâm edip işbu Ali Beşe zevcim olduğu hâlde beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh bin iki yüz akçe mehrimi ve nafaka-i iddet ve me‘ûnet-i süknâm için bi’t-terâzî ta‘yînin olunan altı yüz akçe ki cem‘an bin sekiz yüz akçeyi bana def‘ ve teslîm ben dahi tamamen ahz u kabz edip hukūk-ı zevciyete ve târih-i kitâba gelince beynimizde cereyân eden hukūk-ı zevciyete ve gayra müte‘allika âmme-i de‘âvî ve mutâlebâtdan mezbûr Ali Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve gayra müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Muharremi’l-harâm sene [1]144. Şuhûdü’l-hâl: Mustafa Efendi b. Ahmed, Mehmed Çelebi b. Şa‘ban, Ahmed Çelebi b. Mehmed, Ali Çelebi b. Yusuf.