Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 327 Hüküm no: 402 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küfür davasının sulhla sonuçlandığı Sarrâf tâifesinden işbu bâ‘isü’s-sifr Bedros v. Elican nâm Ermeni meclis-i şer‘-i hatîr-i lâzımü’t-tevkīrde Gabriyel v. Kogaz muvâcehesinde ikrâr ve takrîr-i kelâm edip târih-i kitâbdan bir gün mukaddem merkūm Gabriyel şütûm-ı galîza ile bana şetm etmekle hâlâ mûceb-i şer‘îsini merkūm Gabriyel’den taleb ve da‘vâ sadedinde iken beynimizde münâza‘ât-ı kesîre ve muhâsamât-ı şedîde vâki‘ olmuşidi. El-hâletü-hâzihi beynimize muslihûn tavassut edip da‘vâ-yı mezkûremden fâriğ olup husûs-ı mezkûra vesâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan merkūm Gabriyel’in zimmetini ibrâ ve ıskāt eylediğimden sonra ol dahi kezâlik husûs-ı mezkûra vesâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan benim zimmeti ibrâ ve ıskāt eyledi. Ba‘de’l-yevm bir birimiz ile asla da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 Muharrem sene [1]144. Şuhûdü’l-hâl: Hâfız Mehmed Efendi b. Abdülfettah el-imâm, es-Seyyid İbrahim b. Sâdık, Süleyman Ağa b. Mehmed, Seyyid Mehmed b. Cemaleddin, el-Hâc Ahmed b. Abdullah, el-Hâc Mustafa b. Ahmed, Hüseyin Ağa b. Ahmed, Mehmed Beşe b. Abdullah, Mehmed Çelebi b. Kasım, Salih Efendi b. Mehmed, Bayram Beşe b. Mahmud, Hüseyin Beşe b. Ali, Ebûbekir Beşe b. Ömer, Delot v. Norsis, Karebet v. Mosis.