Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 329 Hüküm no: 404 Orijinal metin no: [81b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Suyolcu Mehmed Çelebi’nin Haticesultan mahallesinde bulunan yanmış ev arsasını Müderris Abdullah Efendi’ye sattığı Mahmiye-i İstanbul’da Edirnekapısı kurbünde Hadîce Sultan mahallesinde sâkin Suyolcu Mehmed Çelebi b. el-Hâc Mustafa nâm kimesne meclis-i şer‘-i hatîr-i lâzımü’t-tevkīrde hâlâ mahmiye-i mezbûrede hilâfeten müvellâ olan umdetü’l-müderrisîni’l-kirâm sahibü hâze’l-kitâb Abdullah Efendi b. el-merhûm Mustafa Efendi mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Ebûbekir menzili ve bir tarafdan Bayrakdâr Musa Beşe menzili ve iki tarafdan tarîk-ı âm ile mahdûd ve muhterik mülk menzil arsamı cemî‘i- tevâbi‘ ve levâhık ve kâffe-i hukūk ve merâfıkıyla tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile müşârün-ileyh Abdullah Efendi’ye yüz altmış iki guruşa bey‘ ve temlîk ve teslîm eyledikde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr yüz altmış iki guruşu müşârün-ileyh Abdullah Efendi yedinden tamamen ahz u kabz eyledim. Fîmâ-ba‘d arsa-i mahdûde-i mezkûre müşârün-ileyh Abdullah Efendi’nin mülk-i müşterâsı ve hakk-ı sırfı olup kat‘a benim alâka ve medhalim kalmamışdır. Keyfe mâ yeşâ ve yahtâr mutasarrıf olsun mübârek-bâd dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min- Muharremi’l-harâm sene [1]144. Şuhûdü’l-hâl: Fahrü’l-kuzât el-Hâc Mehmed Efendi, el-Hâc Mustafa Efendi b. Mehmed, Mehmed Efendi b. Nurullah, Müezzinzâde Mehmed Efendi b. İbrahim Efendi, Mustafa Efendi b. el-merhûm Yunus Efendi, Mehmed Çelebi b. Abdullah tahtacı, Müminzâde Şeyh Mehmed Efendi b. İbrahim, Sarı Mehmed b. Abdullah, İbrahim b. Mustafa du‘âcı, Mehmed b. Mustafa Urfalı.