Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 330 Hüküm no: 405 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mollakestel mahallesinden Ümmügülsüm bt. Yusuf’un oğulları Ahmed ve Mehmed’den nafaka talebi Bâ-imzâ-i hazret-i efendi. Nafaka. Mahmiye-i İstanbul’da Molla Kestel mahallesinde sâkine ve zâtı ta‘rîf-i şer‘î ile mu‘arrefe olan râfi‘atü’l-vesîka Ümmügülsüm bt. Yusuf nâm hatun meclis-i şer‘-i şerîf-i enverde oğulları olup mûsirler olan Ahmed ve Mehmed ibney Mahmud nâm kimesneler mahzarlarında takrîr-i kelâm ve ta‘bîr ani’l-merâm edip ben fakīre ve ma‘sere olup nefsimi infâk ve iksâya âcize ve oğullarım mezbûrân mûsirler olmağla üzerlerine kadr-ı ma‘rûf nafaka ve kisve-bahâ farz ve takdîr olunmak murâdımdır deyip ve hâl vech-i meşrûh üzere olduğunu oğulları mezbûrân Ahmed ve Mehmed’den her biri ba‘de’t-tasdîk hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi mezbûrân Ahmed ve Mehmed’den her biri üzerlerine tarafeynin rızâlarıyla târih-i kitâbdan külle yevm üçer para nafaka ve kisve-bahâ farz ve takdîr edip sarfa ve vakt-i zarûretde istidâne ve lede’z-zafer oğulları mezbûrân Ahmed ve Mehmed’den her birine rücû‘a merkūm[e] Ümmügülsüm Hatun’a izin birle mâ-hüve’l-vâki‘ bi’t-taleb ketb olundu. Fî-gurreti Muharremi’l-harâm sene [1]144. Şuhûdü’l-hâl: Fahrü’l-kuzât Abdullah Efendi Musazâde, Mehmed Çelebi kethudâ-yı muhzırân, Hasan Çelebi b. Abdullah, Salih Çelebi b. Süleyman.