Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 330 Hüküm no: 406 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Ahmed’in Haticesultan mahallesinde bulunan yanmış ev arsasını Suyolcu Mehmed Çelebi’ye sattığı Mübâya‘a-i arsa. Medîne-i Üsküdar’da Takyeci mahallesinde sâkine olup zâtı ta‘rîf-i şer‘î ile mu‘arrefe olan Ümmügülsüm bt. Ahmed nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Suyolcu Mehmed Çelebi b. el-Hâc Mustafa mahzarında ikrâr-ı tâm ve takrîr-i kelâm edip zevcim olup bundan akdem vefât eden Mehmed b. Uncu el-Hâc İbrahim nâm mecnûnun mahmiye-i İstanbul’da Edirnekapısı kurbünde Hadîce Sultan mahallesinde vâki‘ bir tarafdan el-Hâc Ebûbekir menzili ve bir tarafdan Bayrakdâr Musa Beşe menzili ve iki tarafdan tarîk-ı âm ile mahdûd muhterik mülk menzil arsasını mecnûn-ı mezbûrun hasren vârisleri olan vâlidesi Hadîce bt. Bayram ile kız karındaşı Âişe’nin izin ve ma‘rifetleriyle cemî‘ tevâbi‘ ve levâhık ve kâffe-i hukūk ve merâfıkı ile tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Mehmed Çelebi’ye yüz altmış iki guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz altmış iki guruşu mezbûr Mehmed Çelebi yedinden tamamen ahz u kabz eyledim. Fîmâ-ba‘d arsa-i mahdûd-ı mezbûr Mehmed Çelebi’nin mülkü olup benim kat‘a alâka ve medhalim kalmamışdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Muharrem sene [1]144. Şuhûdü’l-hâl: el-Hâc Mehmed Efendi b. Hasan, el-Hâc Mustafa Efendi b. Mehmed, Mehmed Efendi b. Nurullah, Mehmed Efendi b. Müezzin İbrahim Efendi, Tahtacı Mehmed Çelebi b. Abdullah, İbrahim b. Mustafa du‘âcı, Sarı Mehmed b. Abdullah.