Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 331 Hüküm no: 407 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdârhayreddin mahallesinde Zahide Hanım vakfı olup mutassarıfı Ayşe Hatun tarafından tamir ve bina olunan eve yaptığı masrafın tespiti talebi Husûs-ı âti’z-zikrin mahâllinde keşf ve tahrîr bâbında sâdır olan fermân-ı âlîşâna imtisâlen savb-ı şer‘-i kavîmden irsâl olunan Keşf nâibi Mevlânâ Mustafa Efendi b. Ali Efendi [ve] Hâssa mi‘mârlarından Yusuf Halîfe b. Mustafa ile mahmiye-i İstanbul’da Sancakdâr Hayreddin mahallesinde Âişe Hatun bt. Ömer’in sâkine olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i kavîm ettikde mezbûre Âişe Hatun tarafından husûs-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iye ârifân olan es-Seyyid Feyzullah Efendi b. Abdülkerim Efendi ve Süleyman Çelebi b. Uşşâkī Mehmed Efendi şehâdetleriyle sâbit ve sübût-i vekâletine hükm-i şer‘î lâhık olan dâmadı Ömer Ağa b. Halil meclis-i ma‘kūd-ı mezkûrda li-ecli’l-maslaha mütevellî nasb ve ta‘yîn olunan mahalle-i mezbûre imâmı Salih Efendi b. Mehmed mahzarında takrîr-i kelâm ve ta‘bîr ani’l-merâm edip arsası merhûme Zahide nâm sahibetü’l-hayrın sulehâya meşrûta vakfı olup binâsı bir kıt‘a hüccet nâtık olduğu üzere müvekkile-i mezbûrenin silk-i mülk-i sahîhinde münselik olup bir tarafdan imâma meşrûta vakıf menzil ve bir tarafdan ba‘zen ulemâya meşrûta ve ba‘zen Koyun emîni veresesi menzilleri ve bir tarafdan Yazıcı İsmail Çelebi menzili ve bir tarafdan tarîk-ı âm ile mahdûd menzilin müvekkile-i mezbûre Âişe Hatun ta‘mîre muhtâc olup kābil-i süknâ olmamağla bazı mahâllini ta‘mîr ve bazı mahâllinde müceddeden binâ ve ihdâs etmekle harc ve masrûfu ba‘de’l-mu‘âyene ve’l-mesâha takvîm-i sahîh ile tahmîn ve takvîm [82b] olunup masrûfu ne mertebeye bâliğ olduğu hüccet olunmak bi’l-vekâle matlûbumdur dedikde ebniye ve sükūf ahvâline ıttılâ‘ı olan bî-garaz Müslimîn ile mütevellî-yi mezbûr muvâcehesinde mi‘mâr-ı mezbûr mesâhe ettikde ber-mûceb-i defter-i müfredât ta‘mîr ve müceddeden binâ ihdâs eylediği ebniye min-haysü’l-mecmû‘ seksen bin sekiz yüz elli beş akçeye bâliğ olup ebniye-i mezkûrenin mertebe-i tahammülü meblağ-ı mezbûr ile ancak olur noksan ile binâ mümkün değildir deyü mütevellî-yi mezbûr muvâcehesinde mi‘mâr-ı mezbûr vesâir ebniye ve sükūf ahvâline vukūf-ı tâmmı olan bî-garaz Müslimîn icmâ‘ ve ittifâk etmeğin mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 22 min-Zilhicceti’ş-şerîfe sene [1]143. Şuhûdü’l-hâl: es-Seyyid Abdullah Efendi b. Mehmed imâm-ı Çınar, Mustafa Bey b. Mehmed Bey, Fahrü’l-kuzât Şeyhî Mehmed Efendi, Cizyedâr Ali Efendi b. Mahmud, İbrahim Ağa b. el-Hâc Mehmed, Molla Mehmed b. Salih, es-Seyyid İsmail Çelebi b. Mehmed, Şahin Mehmed Ağa b. Abdullah, Molla Abdullah b. Osman, es-Seyyid Mustafa Efendi b. Bostan, es-Seyyid Ahmed Efendi b. Bostan, es-Seyyid Ali Dede b. es-Seyyid Süleyman, Kazzâz Mustafa Çelebi b. Mehmed.