Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 332 Hüküm no: 408 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci Kazası, Kırkalı köyünden vilayet kethudâsı Halil’in kadı kethudâsı İsmail Çelebi vâsıtasıyla kadıya kalemiye olarak verdiği parayı ondan talep edemeyeceği Vilâyet-i Anadolu’da Demirci kazâsına tâbi‘ Ortapare nâhiyesi kurâlarından Kırkalı karyeli ahâlîsinden olup mahmiye-i İstanbul’da Tahtalkal‘a kurbünde Katırhanı demekle ma‘rûf hânda müsâfiren sâkin Halil b. Muslu nâm kimesne meclis-i şer‘-i şerîf-i enverde mahmiye-i mezbûrede Mollagürânî mahallesinde sâkin bâ‘isü hâzihi’l-vesîka İsmail Çelebi b. Süleyman nâm kimesne mahzarında üzerine da‘vâ ve takrîr-i kelâm edip târih-i kitâbdan yirmi bir ay mukaddem kazâ-i mezbûr ahâlîsini bâ-fermân-ı âlî üzerine edâsı lâzım gelen bedel-i avârız ve nüzûlü ol târihde vilâyetimiz kādısı olan Hattât Mustafa Efendi beyne’l-ahâlî tevzî‘ ve taksîm ve defter eylediğinden sonra cem‘ ve tahsîl edip taraf-ı Devlet-i aliyye’den kabzına me’mûra teslîm eylediğinde ben vilâyet kethudâsı ve mezbûr İsmail dahi kādı-yı mezbûrun kethudâsı bulunmağla husûs-ı mezkûr için kādı-yı mezbûra kalemiye deyü verdiğim iki yüz elli guruşu mezbûr İsmail yediyle verdiğim ecilden mezbûru merkūmdan taleb ederim suâl olunsun dedikde mezbûr Halil’in takrîr-i meşrûhu üzere tesâddî eylediği da‘vâsından mezbûr İsmail hasım olmayıp ve mezbûr İsmail’e dahi suâl teveccüh etmemeğin mûcebince mezbûr Halil bi-gayr-ı vech-i şer‘î mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sânî aşer min-Muharremi’l-harâm li-sene erba‘a ve erba‘în ve miete ve elf. Şuhûdü’l-hâl: Mehmed Çelebi b. Abdullah, Mehmed Efendi b. Hasan, Ahmed b. Hasan, Mehmed b. Abdullah.