Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 334 Hüküm no: 410 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanyalı Ali Efendi’den vârislerinin kendilerine intikal eden Yazıcı mahallesindeki evlerini Hulusi Ali Efendi’ye sattıkları Mübâya‘a. Husûs-ı âti’l-beyânın mahâllinde ketb ve tahrîri için bi’l-iltimâs taraf-ı şer‘den irsâl olunan Mevlânâ Bostanzâde es-Seyyid Mustafa Efendi mahmiye-i İstanbul’da Yazıcı mahallesinde sâkin iken bundan akdem vefât eden Yanyalı Ali Efendi b. eş-Şeyh Hasan Efendi’nin hayatında sâkin olduğu menziline varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i nebevî ettikde müteveffâ-yı mezbûrun verâseti zevce-i menkûha-i metrûkesi Fâtıma Hatun bt. İbrahim Ağa ile sulbî kebîr oğlu Ârif Mehmed Efendi ve sulbiye kebîre kızı diğer Fâtıma Hatun’a münhasıra ve tashîh-i mes’elesi yirmi dört sehimden olup sihâm-ı mezbûreden üç sehmi zevcesi mezbûre Fâtıma Hatun’a ve on dört sehmi oğlu merkūm Ârif Mehmed Efendi’ye ve bâkī yedi sehmi kızı mezbûre diğer Fâtıma Hatun’a isâbeti tahakkukundan sonra merkūm Ârif Mehmed Efendi ile zâtları ta‘rîf-i şer‘î ile mu‘arrefe olan mezbûretân Fâtıma ve diğer Fâtıma nâm hatunlar meclis-i ma‘kūd-ı mezkûrda fahrü’l-kuzât sahibü hâze’l-kitâb Hulusi Ali Efendi b. el-merhûm Ahmed Paşa mahzarında her biri ikrâr-ı tâm ve takrîr-i kelâm edip mûrisimiz müteveffâ-yı mezbûrun terekesinden olup mahmiye-i mezbûrede bir tarafdan diğer Fâtıma Hatun’un âhar menzili ve iki tarafdan Sarıkcıbaşı Ömer Ağa nâm kimesnenin menzili arsası ve bir tarafdan tarîk-ı âm ile mahdûd dâhiliyesinde tabaka-i ulyâda iki bâb oda ve bir sofa ve dehliz ve vustâda kenîf ve dehliz ve süflâda bir matbah ve matbah tahtında kömürlük ve bi’r-i mâ ve kilâr ve kenîf ve eşcâr-ı müsmire ve gayr-ı müsmireli bahçe ve hâriciyesinde tabaka-i ulyâda iki bâb oda ve sofa ve dehliz ve vustâda bir kenîf ve dehliz ve tahtânî ahır ve bi’r-i mâ ve havluyu müştemil mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile merkūm Hulusi Ali Efendi’ye bin beş yüz guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr bin beş yüz guruşu merkūm Hulusi Ali Efendi yedinde tashîh-i mezkûr üzere tamamen bi-kadri’l-hısas ahz u kabz eyledik ba‘de’l-yevm menzil-i mahdûd-ı mezbûr merkūm Hulusi Ali Efendi’nin mülk-i müşterâsı ve hakk-ı sırfı olup kat‘a bizim alâka ve medhalimiz kalmamışdır. Keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe selâse ve erba‘în ve mie ve elf. Şuhûdü’l-hâl: Ahmed Efendi b. Halil el-imâm, Halil Efendi b. İbrahim el-müezzin, Hüseyin Çelebi b. Abdullah, Mustafa Çelebi b. Ahmed, es-Seyyid Mustafa Çelebi b. Yahya, Ahmed Efendi b. İsmail, Ahmed Efendi kethudâ-yı Boşnak Süleyman Efendi, Aydınlı Mehmed Efendi el-imâm, Abdullah Efendi b. Mehmed Efendi, Salih Efendi b. Mustafa, Mehmed Efendi tâbi‘-i Uşşâkīzâde, Çukadâr Mustafa Ağa b. ( ), Yahya Çelebi b. İbrahim, el-Hâc Hüseyin tâbi‘-i dâmadzâde efendi, Ahmed Çelebi Kahveci, Mehmed Efendi b. Mustafa, Çukadâr Mustafa Ağa b. el-Hâc Veli, Şa‘ban b. Ahmed-i Koçaç, Şehrî Mustafa Çelebi, Fahrü’l-kuzâtü’l-kirâm Kilârî Ahmed Efendi b. Osman kethudâ-yı Şeyhü’l-islâm-ı sâbık, Koçaş Mehmed Ağa b. Mustafa, Perdeci Mustafa Çelebi b. Mehmed, Kapıçukadâr-ı Mustafa Ağa b. Mehmed, Süleyman Çelebi b. Abdullah Kethudâ ve gayruhum.