Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 336 Hüküm no: 412 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kabasakal mahallesinden Mehmed Çelebi’nin babası Mehmed Efendi’den intikal eden hissesini büyüdükten sonra vasîsi olan annesinden tamamen aldığı İbrâ. Mahmiye-i İstanbul’da Kabasakal mahallesinde sâkin iken bundan akdem vefât eden Mehmed Efendi b. Ali b. Şa‘ban’ın sulbî kebîr oğlu Mehmed Çelebi meclis-i şer‘-i şerîf-i enverde li-eb er karındaşı işbu bâ‘isü’l-vesîka Abdullah Çelebi mahzarında takrîr-i kelâm ve bast-ı merâm edip babam müteveffâ-yı mezbûrun terekesinde ber-mûceb-i defter-i kassâm karındaşım mezbûrun makbûzu olan hisse-i irsiyem ile vazîfe-i ma‘lûmemi ba‘de’l-i‘mâl cem‘ ve tahsîl eylediği altmış iki bin akçeyi beynimizde ma‘lûm âhara ferâğ olunan vakıf menzilden rub‘ hissem bedeli olan elli guruşu hâl-i sıgārımda ber-mûceb-i hüccet kıbel-i şer‘den vasîm olan vâlidem gāibetü ani’l-meclis Âişe bt. Abdullah nâm hatuna tamamen def‘ ve teslîm ol dahi ber-vech-i muharrer yedimden tamamen ahz u kabz ve bi’l-vesâye zabt ve hıfz etmeğin meblağ-ı mecmû‘-ı mezkûrdan karındaşım mezbûr Abdullah Çelebi yedinde ve zimmetinde bir akçe ve bir habbe bâkī kalmamağın husûs-ı mezkûra ve babam müteveffâ-yı mezbûrun terekesine müte‘allika âmme-i de‘âvî ve mutâlebât ve eymân ve muhâsamâtdan karındaşım mezbûr Abdullah Çelebi’yi ibrâ-i âmm-ı kātı‘u’n-nizâ‘la ibrâ ve ıskāt eyledim. Min-ba‘d karındaşı mezbûr Abdullah Çelebi ile kat‘a da‘vâ ve nizâ‘ ve husûmetim yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Muharremi’l-harâm sene [1]144. Şuhûdü’l-hâl: İbrahim b. Abdullah, Hüseyin Efendi b. Salih, Molla Mehmed b. ( ), Mehmed Çelebi b. Veliyüddin, Hüseyin Ağa b. Abdullah, Berber Salih Çelebi, Kâtib el-Hâc Mustafa Efendi, el-Hâc Mustafa b. Ramazan, Salih b. Süleyman muhzır.