Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 336 Hüküm no: 413 Orijinal metin no: [83b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maksud Hatun’un kendisini bâyinen boşayan Mehmed Efendi’den mehir talebi için açtığı davanın sulhla sonuçlandığı Sulh. Mahmiye-i İstanbul’da Kazganî Sadi mahallesi sâkinelerinden olup zâtı Ali Beşe b. İbrahim ve Kasım b. Hüseyin nâm kimesneler ta‘rîfleriyle mu‘arrefe olan Maksud bt. [Abd]ullah nâm hatun meclis-i şer‘-i şerîf-i enverde zevc-i sâbıkı bâ‘isü hâze’l-kitâb Mehmed Efendi b. Mustafa nâm kimesne mahzarında ikrâr-ı tâm ve takrîr-i kelâm edip mezbûr Mehmed Efendi zevcim olup bundan akdem beni bâyinen tatlîk eylediğinde zimmetinde mütekarrir ve ma‘kūdün-aleyh altı bin akçe mehr-i müeccelimi taleb ve da‘vâ eylediğimde beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden beni merkūm Mehmed Efendi ile üç bin akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçeyi mezbûr Mehmed Efendi yedinden tamamen ahz u kabz edip mâ‘adâya müte‘allika âmme-i da‘vâdan mezbûr Mehmed Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik bedel-i sulh-ı mezkûra müte‘allika âmme-i da‘vâdan benim zimmetimi ibrâ ve ıskāt edip bir birimiz ile vechen mine’l-vücûh da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 11 min-Muharremi’l-harâm sene [1]144. Şuhûdü’l-hâl: Mehmed b. İbrahim, Sarı Mehmed b. Abdullah, Mumcu Ali Beşe b. İbrahim, Kasım Mehmed b. Hüseyin, Seyyid Ali b. Mustafa, Tahtacı Mehmed Çelebi b. Abdullah.