Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 337 Hüküm no: 414 Orijinal metin no: [83b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebeci Abdülbaki vakfı olup mahlûl bulunan evin şartı gereği Hacı Derviş’e verildiği Kasr-ı yedden tevcîh-i menzil. Ashâb-ı hayrâtdan merhûm Kebeci Abdülbaki nâm sahibü’l-hayrın süknâsı sulehâya meşrûta vakfı olup mahmiye-i İstanbul’da Mi‘mâr Sinan mahallesinde vâki‘ bir tarafdan Çeşme vakfı olan menzil ve bir tarafdan yine merhûm-ı mezbûrun vakfı âhar menzil ve bir tarafdan tarîk-ı hâs ve bir tarafdan tarîk-ı âm ile mahdûd ma‘lûmü’l-müştemilât menzile tevcîh-i hâkimü’ş-şer‘le mutasarrıf olan Mehmed Efendi b. Mehmed Efendi nâm kimesne meclis-i şer‘-i şerîf-i enverde süknâ-yı menzil-i mezkûrdan kasr-ı yed edip ol vechile süknâ-yı menzil-i mezkûr mahlûl olmağın yine mahalle-i mezbûre ahâlîsinden işbu bâ‘isü’l-kitâb el-Hâc Derviş b. Mehmed nâm kimesne sulehâdan süknâya muhtâc ve min-külli’l-vücûh mahall ü müstahık idiği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver müte‘ayyin olmağla süknâ-yı menzil-i mezkûr ber-mûceb-i şart-ı vâkıf kıbel-i şer‘den mezbûr el-Hâc Derviş’e tevcîh olunup tasarrufiʼçün işbu vesîka ketb ve mezbûr el-Hâc Derviş yedine def‘ ü i‘tâ olundu. Fî 8 min-Muharremi’l-harâm sene [1]144. Şuhûdü’l-hâl: Mehmed Ağa b. Mehmed, Müezzin el-Hâc Hüseyin b. Ahmed, Kayyûm Mustafa Halîfe b. İbrahim, Abdi Beşe b. Abdülkadir, Mehmed Çelebi b. Abdullah, Hüseyin Çelebi b. Abdullah, Salih Çelebi b. Süleyman, Yakub b. Abdullah, Ahmed b. Mustafa.