Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 338 Hüküm no: 415 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kilis’in Kütahoymağı mahallesinden olup Yenicekarasu’da öldürülen Mehmed’in terekesinin vârislerine teslim edildiği Mirasdan ahz u kabz. Vilâyet-i Anadolu’da medîne-i Kilis mahallâtından Kütahoymağı mahallesi ahâlîsinden olup vilâyet-i Rumeli’nde Yenice Karasu kasabasında müsâfiren sâkin iken bundan akdem katîlen vefât eden Mahmud b. el-Hâc Ömer b. el-Hâc Mahmud’un verâseti zevce-i menkûhası Hadîce bt. Salih nâm hatun ile sulbiye sagīre kızı Âişe’ye ve vâlidesi Rahime bt. Hüseyin nâm Hatun’a ve babası mezbûr el-Hâc Ömer’e münhasıra ve tashîh-i mes’elesi yirmi dört sehimden olup sihâm-ı mezbûreden üç sehmi zevcesi mezbûre Hadîce Hatun’a ve on iki sehmi kızı sagīre-i mezbûreye ve dört sehmi vâlidesi mezbûre Rahime Hatun’a ve beş sehmi babası mezbûr el-Hâc Ömer’e isâbeti tahakkukundan sonra zâtı el-Hâc Nu‘man b. Ahmed ve Ahmed ağa b. Musa nâm kimesneler ta‘rîfleriyle mu‘arrefe olan mezbûre Hadîce asâleten ve mezbûrân el-Hâc Ömer ve Rahime Hatun taraflarından husûs-ı âti’z-zikre bâ-hüccet-i şer‘iye vekîlleri olan el-Hâc Ahmed b. Şeyh Halil vekâleten ve sagīre-i mezbûrenin kezâlik bâ-hüccet-i şer‘iye vasîsi olan el-Hâc Osman b. el-Hâc Habib vesâyeten meclis-i şer‘-i hatîr-i lâzımü’t-tevkīrde müteveffâ-yı mezbûrun terekesine bi’l-vesâye vâzı‘u’l-yed olan bâ‘isü hâze’l-kitâb Mustafa Efendi b. Hüseyin nâm kimesne mahzarında her biri bi’l-asâle ve bi’l-vekâle ve bi’l-vesâye ikrâr-ı tâm ve takrîr-i kelâm edip merkūm Mustafa Efendi mûrisimiz müteveffâ-yı mezbûrun terekesini kalîl ü kesîr, celîl ü hakīr ber-mûceb-i defter-i kassâm tamamen bize def‘ ve teslîm biz dahi bi’l-asâle ve bi’l-vekâle ve bi’l-vesâye tashîh-i mezkûr üzere bi-kadri’l-hısas bi’t-tamam ve’l-kemâl ahz u kabz eyledik. Min-ba‘d tereke-i müteveffâ-yı mezbûrdan merkūm Mustafa Efendi yedinde bir akçe ve bir habbe hakkım bâkī kalmayıp husûs-ı mezkûra müte‘allika âmme-i de‘âvî ve kâffe-i mutâlebâtdan mezbûr Mustafa Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 ( ) li-sene 1144. Şuhûdü’l-hâl: Hazînedâr Ahmed Ağa b. ( ), Mirâhur İbrahim Ağa b. ( ), Çukadâr Ahmed Ağa b. Musa, Küçük Ahmed b. ( ), Haffâf Feyzullah Çelebi, Menzilci Seyyid Ahmed Çelebi, el-Hâc Nu‘man b. Ahmed.