Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 338 Hüküm no: 416 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacer Hatun’un oğlu Lütfullah için ödenen nafakanın yetmediğinden arttırılması talebinin kabul edildiği Nafaka. Derûn-ı hüccetde ismi mastûre Hacer Hatun bt. Mehmed zâtı ta‘rîf-i şer‘î ile mu‘arrefe oldukdan sonra meclis-i şer‘-i şerîf-i enverde zevci sâbıkı olup kezâlik derûn-ı hüccetde mastûrü’l-ism el-Hâc Hasan b. Süleyman mahzarında takrîr-i kelâm edip mezbûrun firâşından hâsıl ve benden mütevellid sagīr oğlum Lütfullah’ın nafaka ve kisve-bahâsıʼçün babası mezbûr el-Hâc Hasan üzerine bundan akdem farz ve takdîr olunan yirmi ikişer para nafaka ve kisve ve mesârif-i sâiresine kifâyet etmemekle kadr-ı kifâye nafaka farz ve takdîr olunmak murâdımdır dedikde gıbbe’t-tasdîkı’ş-şer‘î tarafeynin rızâlarıyla hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi sagīr-i mezbûr Lütfullah’ın ikişer para nafaka ve kisve-bahâ vesâir mesârifiʼçün babası mezbûr üzerine külle yevm ikişer para dahi zam ve farz ve takdîr edip sarfa ve vakt-i zarûretde istidâne ve lede’z-zafer babası merkūm el-Hâc Hasan’ın üzerine rücû‘a mezbûre Hacer Hatun’a kıbel-i şer‘den izin vermeğin mâ-hüve’l-vâki‘ bi’t-taleb ketb olundu. Fî 10 min-Muharremi’l-harâm sene 1144. Şuhûdü’l-hâl: el-Hâc Halil b. Hüseyin, Mustafa Çelebi b. Nasuh, Yusuf Çelebi b. Ahmed, İbrahim Çavuş b. Süleyman, Salih Çelebi b. Süleyman, Hasan b. Abdullah.