Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 339 Hüküm no: 417 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefeli mahallesinde Şerife Ayşe Hatun vakfı olup yanmış olan evin yerinin vakfın mütevellisi tarafından Abdülbaki Ağa’ya kiralandığı Mahmiye-i İstanbul’da Kefeli mahallesinde vâki‘ merhûme Şerîfe Âişe Hatun bt. Seyyid Mustafa Efendi nâm sahibetü’l-hayrın er karındaşı oğlu olup zikri âtî vakfın galle ve tasarrufuna yedinde olan vakfiye-i ma‘mûlün-bihâ mantûku üzere ber-vech-i meşrûta bi’l-fi‘il mütevellî olan Abdurrahman Çelebi b. Ahmed Efendi nâm kimesne meclis-i şer‘-i hatîr-i lâzımü’t-teşrîfde bâ‘isü hâze’l-kitâb Abdülbaki Ağa b. Abdurrahman mahzarında bi’t-tevliye takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan mezbûre Şerîfe Âişe Hatun vakfı olup Ebûbekir Çelebi ve Yusuf Çelebi tasarruflarında olan menzil ve bir tarafdan diğer Âişe Hatun vakfı menzili ve iki tarafdan tarîk-ı âm ile mahdûd tûlen ve arzen be-hesâb-ı terbî‘î dört yüz altmış dört zirâ‘ arsa üzerine mebnî vakıf menzil bundan akdem vâki‘ olan harîkde muhterik olup eser-i binâdan nesne kalmayıp arsa-i sırfa kalmağın arsa-i mezkûre üzerinde binâya kat‘a cânib-i vakfda nesne olmayıp benim dahi bir vechile binâya iktidârım olmamağın icâreteyn-i ma‘lûmeteyn ile âhara îcâr olunmak cânib-i vakfa evlâ ve enfa‘ olduğunu sikāt-ı muvahhidînden ve mahalle-i mezbûre ahâlîsinden işbu hâzırûn bi’l-meclis ba‘de’l-ihbâr ber-vech-i muharrer kıbel-i şer‘den me’zûn olduğuma binâen arsa-i mezkûre üzerine kendi mâlından icâre-i mu‘accelesine mahsûben binâ ihdâs edip yevmî beş akçe icâre-i müeccele ile ba‘de’l-müzâyede Abdülbaki Ağa tâlib ve râgıb olup ziyâde ile kimesne rağbet etmemeğin arsa-i mezkûreyi ber-minvâl-i muharrer mezbûr Abdülbaki Ağa’ya bi’t-tevliye îcâr ve tefvîz ve teslîm eylediğimde [84b] ol dahi ber-vech-i muharrer istîcâr ve tefevvüz ve tesellüm ve kabûl eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: Hüseyin Efendi b. Ali el-imâm, Mustafa Halîfe b. Abdülbaki el-müezzin, el-Hâc Veli b. Mehmed, <<İskender>> Abdülbaki Efendi b. Ahmed, Mehmed Ağa b. İskender, Ahmed Çelebi b. Ali İbrahim Çelebi b. Mehmed, Molla Ebûbekir b. Hasan, Ali Odabaşı b. İbrahim, Abdullah Çelebi b. Abdurrahman, el-Hâc Ali b. Mustafa, Abdurrahman Çelebi [b.] el-Hâc Hasan, el-Hâc Ali b. Abdullah, Mehmed Çelebi b. Mustafa, İbrahim b. Ramazan, Salih b. Süleyman.