Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 340 Hüküm no: 418 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenicekarasu’da öldürülen Mehmed’in terekesinin vârisleri arasında taksimi Sulh. Vilâyet-i Anadolu’da medîne-i Kilis mahallâtından Kütahoymağı mahallesi ahâlîsinden olup vilâyet-i Rumeli’nde Yenice-i Karasu kasabasında müsâfiren sâkin iken bundan akdem katîlen vefât eden Mahmud b. el-Hâc Ömer b. Mahmud’un verâseti zevce-i menkûhası Hadîce bt. Salih nâm hatun ile sulbiye sagīre kızı Âişe’ye ve vâlidesi Rahime bt. Hüseyin nâm hatuna ve babası mezbûr el-Hâc Ömer’e münhasıra ve tashîh-i mes’elesi yirmi dört sehimden olup sihâm-ı mezbûreden üç sehmi zevcesi mezbûre Hadîce Hatun’a ve on iki sehmi kızı sagīre-i mezbûreye ve dört sehmi vâlidesi mezbûre Rahime’ye ve beş sehmi babası mezbûr el-Hâc Ömer’e isâbeti tahakkukundan sonra zâtı el-Hâc Nu‘man b. Ahmed ve Ahmed Ağa b. Musa nâm kimesnelere ta‘rîfleriyle mu‘arrefe olan mezbûre Hadîce meclis-i şer‘-i hatîr-i lâzımü’t-tevkīrde bâ‘îsü’l-kitâb mezbûrân el-Hâc Ömer ve Rahime Hatun taraflarından husûs-ı âti’z-zikre bâ-hüccet-i şer‘iye vekîlleri olan el-Hâc Ahmed b. Şeyh Halil ve sagīre-i mezbûrenin kezâlik bâ-hüccet-i şer‘iye vasî olan el-Hâc Osman b. el-Hâc Habib nâm kimesne mahzarında ikrâr ve takrîr-i kelâm edip zevcim müteveffâ-yı mezbûrun zimmetinde mütekarrir olan yirmi beş guruş mehr-i müeccelim ile tashîh-i mezkûr üzere sümün hisse-i irsiyemi tereke-i müteveffâ-yı mezbûrdan olmak üzere vekîl-i mezbûr el-Hâc Ahmed ile vasîyy-i mezbûr el-Hâc Osman’dan taleb ve da‘vâ ve ba‘de vukū‘-ı münâza‘a beynimize muslihûn tavassut edip da‘vâ-yı mezkûremden beni mezbûr el-Hâc Osman ile otuz guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz guruşu mezbûrân yedlerinden tamamen ahz u kabz edip husûs-ı mezkûra müte‘allika âmme-i da‘vâdan müvekkilân-ı mezbûrân ile vekîl-i merkūm el-Hâc Ahmed’in ve vasîyy-i merkūm el-Hâc Osman’ın zimmetlerini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Muharremi’l-harâm sene [1]144. Şuhûdü’l-hâl: Hazînedâr Ahmed Ağa, Mirâhur İbrahim Ağa, Çukadâr Ahmed Ağa b. Musa, Küçük Ahmed, Haffâf Feyzullah Çelebi.