Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 341 Hüküm no: 419 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in tasarrufunda olan Demirkapı mahallesindeki evini İsmail Efendi ve karısına sattığı Hâlâ Saray-ı hümâyûn’da Hâsoda ağalarından umdetü’l-emâcid ve’l-ekârim Ahmed Bey b. el-merhûm Osman Paşa taraflarından ber-vech-i âtî ikrâra vekîl olduğu Mehmed Bey b. el-Hâc Osman ve İbrahim Bey b. Mehmed nâm kimesneler şehâdetleriyle şer‘an sâbit olan Silâhşör-i şehriyârî Tırnakçı İbrahim Paşazâde Mehmed Bey meclis-i şer‘-i şerîf-i enverde hâlâ Reisülküttâb olan râfi‘u’l-kitâbi’l-mebsût umdetü erbâbü’t-tahrîr ve’r-rakām zübdetü ashâbi’t-tastîr ve’r-rakām makbûl-i ehl-i dîvân sahibü’l-fehm ve’l-iz‘ân izzetlü İsmail Efendi b. Ali Efendi ile halîle-i mükerremeleri zahru’l-muvakkarât Emetullah Hatun bt. Ali Ağa taraflarından şirâ-i âti’z-zikri tasdîka vekîl-i şer‘îleri olan Mehmed Ağa b. Osman mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Ahmed Bey akd-i âti’z-zikrin sudûruna değin arsasının mahmiye-i İstanbul’da Demirkapı kurbünde Dâye Hatun câmi‘-i şerîfine ayda yüz yirmi akçe mukāta‘a-i kadîmesi olup ebniyesi yedimde mülk ve hakkım olan mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd hâriciyede fevkānî iki bâb oda ve kenîf ve dâhiliyede tabaka-i ulyâda fevkānî üç bâb oda ve bir sofa ve dehliz ve vustâda bir bâb kilâr odası ve tahtânî matbah ve bi’r-i mâ ve kenîf ve bir mikdâr havluyu müştemil menzilimi tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile müvekkil-i mûmâ ileyh İsmail Efendi ile halîle-i mükerremeleri Emetullah Hatun’a iki bin beş yüz guruşa ale’l-iştirâki’s-seviy bey‘ ve temlîk ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl buyurduklarından sonra semeni olan meblağ-ı mezbûr iki bin beş yüz guruşu yedlerinde tamamen ahz u kabz ve tesellüm eyledim. Ba‘de’l-yevm menzil-i mezbûrda alâka ve medhalim kalmayıp [85a] mûmâ-ileyh İsmail Efendi hazretleriyle halîle-i mükerremeleri Emetullah Hatun’un ale’l-iştirâk mülk-i müşterâlarıdır. Keyfe mâ yeşân ve yahtârân tasarruf buyursunlar dedi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 15 min-Muharremi’l-harâm sene [1]144. Şuhûdü’l-hâl: Hamza Efendi b. Abdullah, Fahrü’l-küttâb Nuh Efendi tezkire-i evvel, Fahrü’l-küttâb Hâşim Efendi mektûbî, Kîsedâr İsmail Efendi b. Ali, Ahmed Efendi b. Veliyüddin, Osman b. Mustafa, Süleyman b. Ali, Mehmed b. Ali, el-Hâc İsmail b. Abdullah.