Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 342 Hüküm no: 420 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu Kazaskeri Sâlim Mehmed Emin Efendi’nin İslambey mahallesinde bulunan bahçeli evini Hazine-i hâssa odasının para vakfı mütevellisine istiğlâl yoluyla sattığı İstiğlâl. Hâlâ Sadr-ı Anadolu olan a‘lemü’l-ulemâi’l-mütebahhirîn efdalü’l-fudalâ’i’l-müteverri‘în el-mevle’l-âlemi’r-Rabbânî ve’n-nihrîri’l-fâzılü’s-Samedânî efdalü’l-müte’ahhirîn sa‘âdetlü semâhatlü Sâlim Mehmed Emîn Efendi hazretleri taraf-ı bâhirü’ş-şereflerinden ber-vech-i âtî ikrâra vekîl olduğu İbrahim Efendi b. Mustafa ve Osman Çelebi b. Yusuf şehâdetleriyle şer‘an sâbit olan kethudâları fahrü’l-kuzât es-Seyyid Hasan Efendi b. es-Seyyid Abdullah meclis-i şer‘-i şerîf-i enverde Hazîne-i hâssa odasının nukūd-ı mevkūfesine kāimmakām-ı mütevellî olan fahrü’l-akrân bâ‘isü hâze’l-kitâb hâlâ Bâzergânbaşı Hüseyin Ağa b. Abdülmennan mahzarında bi’l-vekâle ikrâr ve takrîr-i kelâm edip müvekkil-i müşârün-ileyh efendi hazretleri medîne-i Hazret-i Ebî Eyüb el-Ensârî’de İslâmbey mahallesinde vâki‘ Ârif Efendi bahçesi demekle arîf bir tarafdan sâbıkā Şam Kādısı Ahmed Efendi menzili ve bir tarafdan ba‘zen tasarrufumda olan sagīr menzil ve bakkāl dükkânı ve bir tarafdan İdris Köşkü cânibi ve bir tarafdan Baltacılar Kethudâsı Mehmed Ağ menzili ve bir tarafdan tarîk-ı âm ile mahdûd dâhiliyede beş bâb fevkānî oda ve iki bâb tahtânî oda hamam ve câmekân ve matbah ve bi’r-i mâ ve kenîf ve hâriciyede yedi bâb fevkānî ve iki bâb tahtânî oda ve bir köşk ve ahır ve samanlık ve kenîf ve eşcâr-ı müsmire ve gayr-ı müsmireli beş dönüm mikdârı bahçe ve iki dönüm mikdârı bağ ve havluyu müştemil mülk menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Hüseyin Ağa’ya üç bin dokuz yüz yirmi guruşa bi-tarîkı’l-istiğlâl bey‘ ve teslîm eylediğimde ol dahi yedinde olan mal-ı vakf-ı mezbûr ile bi’t-tevliye iştirâ ve tesellüm etmekle semeni olan meblağ-ı mezbûr üç bin dokuz yüz yirmi guruşu yedinden tamamen ahz u kabz eylediğimden sonra mütevellî-yi mezbûr menzil-i mahdûd-ı mezbûru gıbbe’t-tahliyeti’ş-şer‘iye ve’t-takābuzi’l-mer‘î bin yüz kırk üç senesi Zilhicceti’ş-şerîfesi gurresinden bu sene tamamına değin beş yüz elli sekiz guruşa bana îcâr ve teslîm eylediğinde ben dahi ber-vech-i muharrer istîcâr ve tesellüm ve kabûl eyledim dedikde gıbbe’t-tasdîkı’ş-şer‘î mezbûr Hüseyin Efendi meclis-i mak‘ūd-ı mezkûrda merkūm Hüseyin Ağa mahzarında i‘âde-i kelâm edip bey‘-ı mezbûr hakīkatde rehn ve meblağ-ı mezkûr üç bin dokuz yüz yirmi guruş müvekkilim müşârün-ileyh hazretlerinin zimmetlerinde vakf-ı mezbûra deyn olmağla mezbûr üç bin dokuz yüz yirmi guruşa tarafeynden emr ve kabûlü hâvî kefâlet-i sahîha-i şer‘iye ile kefîl oldum dedikde mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: Hâfız İbrahim Efendi b. Hacı Hasan, es-Seyyid İbrahim Efendi b. Mehmed Efendi, Abdullah Efendi b. el-Hâc Mehmed, el-Hâc Mustafa b. Mehmed, Alizâde Mustafa Efendi b. ( ), Bezzâstân Kethudâsı es-Seyyid İbrahim Ağa, Ömer Ağa b. el-Hâc Osman, Ali Kethudâ.