Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 343 Hüküm no: 421 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Abdullah Efendi ve karısı Ayşe Hatun’un tasarruflarında olan mülk evlerini istiğlâl yoluyla Yusuf Efendi’nin çocuklarının vasîsi Hadîce Hatun’a sattıkları İstiğlâl. Mahmiye-i İstanbul’da Ali Paşa-yı atîk mahallesinde sâkin es-Seyyid Abdullah Efendi b. Halil ile zevcesi olup zâtı ta‘rîf-i şer‘î ile mu‘arrefe olan Âişe Hatun bt. Mehmed Efendi meclis-i şer‘-i şerîf-i enverde Rumeli kuzâtından olup bundan akdem vefât eden Yusuf Efendi b. Abdullah’ın eytâm-ı sıgārına vasîleri olan vâlideleri Hadîce Hatun bt. Abdullah Efendi’nin zevci ve tarafından husûs-ı âti’z-zikre vekîl-i sâbitü’l-vekâlesi umdetü kuzâtü’l-İslâm Mehmed Efendi b. Hüseyin Efendi mahzarında her biri ikrâr ve takrîr-i kelâm edip mârrü’z-zikr Ali Paşa-yı atîk mahallesinde vâki‘ etrâf-ı erba‘ası Saraylı Âişe Hatun ve Külâhî Mehmed Çelebi menzilleri ve müteehhilîn odaları ve tarîk-ı âm ile mahdûd büyût-ı adîdeyi müştemil ale’l-iştirâk mutasarrıflar olduğumuz mülk menzilimizi bi-tarîkı’l-istiğlâl vasiyye-i mezbûre Hadîce Hatun’a yüz elli guruşa bey‘ ve teslîm eylediğmizde mezbûre ber-vech-i muharrer iştirâ ve tesellüm etmeğin meblağ-ı mezbûr yüz elli guruşu vasîsi olduğu eytâm mâllarından olmak üzere mezkûre Hadîce Hatun yedinden tamamen ahz u kabz eylediğimizden sonra vasiyye-i mezbûre Hadîce Hatun menzil-i mahdûd-ı mezbûru gıbbe’t-tahliye ve’t-takābuz târih-i kitâbdan bir sene tamamına değin yirmi iki buçuk guruşa bi’l-vesâye bize îcâr ve teslîm eyledikde bizler dahi minvâl-i muharrer üzere istîcâr ve kabûl ve kabz eyledik ve her birimiz derk-i menziline ve hâl-i merkūma kefîl ve dâminleriz dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Muharrem sene [1]144. Şuhûdü’l-hâl: Zübdetü’l-kuzât Abdülhalim Efendi b. Hüseyin Efendi, La‘lîzâde es-Seyyid Mehmed Efendi, Molla Ahmed b. Mehmed Efendi, Hasan Çelebi kethudâ-yı La‘lîzâde, el-Hâc Osman b. Mustafa berber, Ahmed Çelebi b. Emrullah, Molla Mustafa.