Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 344 Hüküm no: 422 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri Canini’ye kefil olan Mosiko’nun alacaklı Mısır tüccârı Petro’ya borcu ödediği Mısır tüccârından olup mahmiye-i İstanbul’da Yemiş iskelesi kurbünde sâkin Petro v. Moski nâm zimmî meclis-i şer‘-i şerîf-i enverde bâ‘isü hâze’s-sifr Mosiko v. Malabore nâm Yahûdî muvâcehesinde ikrâr ve takrîr-i kelâm edip yine Mısır tüccârından gāib ani’l-meclis Dimitri v. Canini v. Dimitri zimmetinde bundan akdem pirinç bahâsından hakkım olan beş yüz kırk bir guruşu taleb ve da‘vâ eylediğimde mesfûr Yahûdî “meblağ-ı mezbûr bende ve zimmetimdedir benden al” deyü lede’ş-şuhûd ikrâr ve işhâd etmeğin meblağ-ı mezbûru merkūm Yahûdî’den da‘vâ ve müdde‘âmı şühûd-ı udûlle muvâcehesinde ba‘de’l-isbât ve’l-hükm mesfûr Yahûdî meblağ-ı mezbûru tamamen bana edâ ve teslîm ben dahi yedinden tamamen ahz ve kabz eylediğimden sonra husûs-ı mezkûra ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve muhâsamâtdan mesfûr Yahûdî’yi ibrâ-i âmm-ı kātı‘u’n-nizâ‘la ibrâ ve ıskāt eyledim. Min-ba‘d bir birimiz ile vechen mine’l-vücûh da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 Muharrem sene [1]144. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Abdullah b. Mustafa, Du‘âcı Molla İbrahim b. Mustafa, Kethudâ Mehmed Ağa b. Mehmed, Yakub b. Abdullah.