Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 347 Hüküm no: 424 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Efendi’nin Antab kazasında olan bahçe hisselerini Seyyid Mehmed Efendi’ye sattığı Vilâyet-i Anadolu’da Antab kazâsı ahâlîsinden mahmiye-i İstanbul’da Cezerî Kasım Paşa mahallesinde sâkin Ömer Efendi b. el-Hâc Ömer b. el-Hâc Ali Ağa meclis-i şer‘-i şerîf-i enverde işbu bâ‘isü’l-kitâb es-Seyyid Mehmed Efendi b. el-Hâc Ömer Ağa mahzarında ikrâr ve takrîr-i kelâm edip nefs-i kazâ-i mezkûr mahallâtından Corcob mahallesinde vâki‘ bir tarafdan Musulluzâde Hızır Ağa bostanı ve üç tarafdan tarîk-ı âm ile mahdûd eşcâr-ı müsmire ve gayr-ı müsmireyi müştemil müşâre ta‘bîr olunur dört yüz müşâre mülk bahçeden nısf hisse-i şâyi‘amı ve yine mahalle-i mezbûrede vâki‘ bir tarafdan Ramazan Efendizâde Ahmed Ağa tasarrufunda olan vakf arsa ve bir tarafdan Anavâyîzâde es-Seyyid Mehmed Çelebi mülkü ve iki tarafdan tarîk-ı âm ile mahdûd ve eşcâr-ı müsmire ve gayr-ı müsmireyi müştemil bahçeden nısf hisse-i şâyi‘amı ve yine mahalle-i mezbûrede lede’l-ahâlî ve’l-cîrân ma‘lûmü’l-hudûd ve’l-müştemilât bostandan dahi yüz elli müşâre nısf hisse-i şâyi‘amı tarafeynden îcâb ve kabûlü [hâvî] bey‘-ı bâtt-ı sahîh-i şer‘î ile işbu es-Seyyid Mehmed Efendi’ye altı yüz guruş ile meclis-i şer‘-i akidde muzî‘a adedi nâ-ma‘lûm bir kabza fülûsa bi-safkatin vâhidetin bey‘ ve temlîk ve mahâllinde zabt ve tasarrufa merkūm es-Seyyid Mehmed Efendi’yi taslît eylediğimde ol dahi ber-vech-i muharrer kabûl ve semeni olan meblağ-ı mezbûr altı yüz guruşu yedinden tamamen ahz u kabz eyledim. Min-ba‘d zikrolunan bahçe ve bostanın nısf hissesinde alâka ve medhalim kalmamışdır. Keyfe mâ yeşâ ve yahtâr mahâllinde mutsarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-M sene 1144. Şuhûdü’l-hâl: el-Hâc Ahmed Ağa b. Hamza, Çolak Ebûbekir Beşe b. Ömer, Halil Çelebi b. el-Hâc Ömer, el-Hâc Seyfullah Ağa b. Abdullah, Hamza Efendi b. İvaz, Şeyh Mehmed Efendi b. Halimzâde, Şeyh Mustafa Efendi b. Mehmed.