Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 348 Hüküm no: 425 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Hadice’nin ölümüne sebep olan at hamallarından Seyyid Hasan ve Haçador’a açılan davanın sulhla sonuçlandığı Sulh. Mahmiye-i İstanbul’da Muhtesib İskender mahallesinde sâkine olup bundan akdem vefât eden Hadîce bt. Mustafa b. Ahmed nâm sagīrenin verâseti babası mezbûr Mustafa ile vâlidesi Âişe bt. Hasan nâm hatuna münhasıra oldukdan sonra mezbûre Âişe Hatun asâleten ve babası gāib ani’l-meclis mezbûr Mustafa tarafından husûs-ı âti’l-beyâna vekîl-i <> şer‘îsi olan yine akrabâsından diğer Mustafa Çelebi b. Mehmed vekâleten meclis-i şer‘-i hatîrde at hammâllarından es-Seyyid Hasan b. es-Seyyid Mustafa ve Haçador v. Bali muvâcehelerinde bi’l-asâle ve bi’l-vekâle ikrâr ve takrîr-i kelâm edip târih-i kitâbdan yirmi üç gün mukaddem sagīre kızım Hadice’yi Edirnekapısı’nda mezbûr es-Seyyid Hasan hammâl bargirlerini mu‘tâddan ziyâde sürerken te‘addîsinden nâşî çilete ta‘bîr olunur ipi kızım sagīre-i mezbûrenin boğazına geçip ol vechile vefât etmeğin mûceb-i şer‘îsini mezbûr es-Seyyid Hasan ile merkūm Haçador’dan bi’l-asâle ve bi’l-vekâle taleb ve da‘vâya tesâddî eylediğimizde ba‘de vukū‘ı’l-münâza‘a beynimize muslihûn tavassut edip da‘vâ-yı mezkûremden bizi mezbûrân ile yetmiş guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr yetmiş guruşu yedlerinden tamamen ahz u kabz eylediğimizden sonra husûs-ı mezkûra müte‘allika âmme-i da‘vâdan bi’l-asâle ve bi’l-vekâle mezbûr es-Seyyid Hüseyin ile merkūm Haçador’un zimmetlerini ibrâ ve ıskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-Muharremi’l-harâm sene [1]144. Şuhûdü’l-hâl: Mehmed Çelebi b. Abdullah, Salih Çelebi b. Süleyman, Mehmed Kasım el-muhzır, Kādızâde İbrahim Çelebi.