Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 348 Hüküm no: 426 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem asıllı cariye Fatıma’nın Abdülkerim tarafından satın alındığı, kardeşi İsmail Bey’in hak iddiasının kabul edilmediği Câriye da‘vâsından men‘. Mahmiye-i İstanbul’da Firuzağa mahallesinde sâkine iken bundan akdem vefât eden Hadîce bt. Mehmed b. Mehmed’in verâseti sadrı kebîr oğulları İsmail Bey b. Mahmud ve Abdülkerim b. Mahmud’a münhasıra olduğu şer‘an zâhir ve müte‘ayyin oldukdan sonra mezbûr İsmail Bey meclis-i şer‘-i şerîf-i enverde işbu râfi‘u’l-kitâb karındaşı mezbûr Abdülkerim mahzarında üzerine da‘vâ ve takrîr-i kelâm edip vâlidemiz müteveffât-ı mezbûrenin terekesinden olup evsâfı beynimizde ma‘lûm bir re’s Acemiyetü’l-asl Fâtıma bt. Abdullah nâm câriye ale’l-iştirâki’s-seviy ırsen bize intikāl etmiş iken mezbûr Abdülkerim câriye-i merkūmeye müstakillen bi-gayr-ı hakkın vaz‘-ı yed eder suâl olunup câriye-i mezbûrede olan nısf hisse-i irsiyemden kasr-ı yedine tenbîh olunmak matlûbumdur dedikde gıbbe’s-suâl mezbûr Abdülkerim cevâbında câriye-i mezbûreyi bundan akdem gāib ani’l-meclis Harâccı Ebûbekir b. ( ) nâm kimesneden iki yüz otuz guruş semen-i medfû‘ ve makbûza kendi mâlım ile iştirâ edip ol vechile yedimde mülk ve hakkım olmağın bi-hakkın vaz‘-ı yed ederim hatta vâlidem müteveffât-ı mezbûre hâl-i hayatında iki ay mukaddem câriye-i mezbûre oğlum mezbûr Abdülkerim’in kendi mâlıyla iştirâ olunmuş mülküdür. Câriye-i mezkûrede benim kat‘a alâka ve medhalim yokdur deyü alâ-ruûsi’l-işhâd ikrâr [87a] ve işhâd etmişidi deyü def‘le mukābele edicek gıbbe’l-istintâk ve’l-inkâr mezbûr Abdülkerim’den def‘-i mezkûruna mutâbık beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sükkânından Hasan Çelebi b. Ahmed ve Mustafa Çelebi b. Şa‘ban nâm kimesnelerin li-ecli’ş-şehâde meclis-i şer‘-i şerîfe hâzırân olup istişhâd olundukda fi’l-hakīka mezbûr Abdülkerim’in vâlidesi müteveffât-ı mezbûre Hadîce bt. Mehmed b. Mehmed nâm hatun fevtinden iki ay mukaddem hâl-i hayatında câriye-i mezbûre Fâtıma’yı oğlum mezbûr Abdülkerim kendi mâlıyla iştirâ eyledi. Câriye-i mezkûre oğlum mezbûr Abdülkerim’in mülk-i müşterâsıdır. Benim kat‘a alâka ve medhalim yokdur deyü bizim huzûrumuzda ikrâr ve bizi işhâd etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eyledikde gıbbe’t-ta‘dîl ve’t-tezkiye şehâdetleri makbûle olmağın mûcebince müdde‘î-yi mezbûr İsmail Bey bî-vech mu‘ârazadan men‘ birle mâ-vaka‘a bi’t-taleb ketb olundu. Fî 17 min-M sene 1144. Şuhûdü’l-hâl: Mustafa Çelebi b. Ahmed, İbrahim Çelebi b. Mustafa, Mehmed Çelebi b. Ali, Abdullah Çelebi b. Mehmed, Abdullah Çelebi b. Ali, Mehmed Çelebi b. Abdullah, es-Seyyid Ali Çelebi b. ( ).