Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 304 Hüküm no: 435 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed’in ekmek fırınında çalışırken zarar verip firar eden Haçok’un kefilinin zararı karşıladığı Mahmiye-i İstanbul’da Üsküblü Mahallesi’nde sâkin el-Hâc Mehmed b. el-Hâc Receb mahfil-i kazâda habbâz tâifesinden işbu bâ‘isü’l-kitâb Havas v. Şahmed muvâcehesinde ikrâr ve takrîr-i kelâm edip mahalle-i merkūmede tavuk pazarında vâki‘ çavdar fırını demekle meşhûr mülk ekmekçi fırınında tezgâhdârım olan Haçok v. Yani nâm Ermeni zikrolunan fırında benim elli dört bin akçelik rızkımı itlâf ve istihlâk edip firâr eyledikde mezbûr Havas gāib ani’l-meclis Aleksan v. Mercan ile herbir malın cem‘îsine kefîl olmuşlar idi. Hâlâ meblağ-ı mezbûru kefâleti hasebiyle merkūm Havas’dan da‘vâ sadedinde iken aramıza muslihûn tavassut edip otuz bin akçeye mezbûr Havas ile beynimizde inşâ-i akd-i sulh eylediklerinde ben dahi sulh-i mezbûru kabûl ve meblağ-ı mezbûr otuz sekiz bin akçeden on bin akçesini mezbûr Havas’dan ahz u kabz edip bâkī kalan yirmi sekiz bin akçe hakkımı târîh-i kitâbdan yüz yirmi gün tamamına değin imhâl eyledikden sonra husûs-ı mezbûra müte‘allik da‘vâdan zimmetini ibrâ ve kātı‘u’n-nizâ‘ ile ibrâ ve ıskāt eyledim, min-ba‘d da‘vâ ve nizâ‘ım kalmadı, eğer mazmûn-ı kitâba muhâlif bir tarîk ile benden bi’z-zât ve bi’l-vâsıta da‘vâ sudûr ederse lede’l-hükkâm istimâ‘ ve ısgā olunmaya dedikde mukırr-ı mezbûr el-Hâc Mehmed’i ikrâr-ı meşrûhunda el-mukarru lehü’l-mezbûr Havas vicâhen tasdîk ve şifâhen tahkīk edicek mâ-hüve’l-vâki‘ bi’t-taleb sebt olundu. Fi’l-yevmi’l-hâmis min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Ali Efendi b. Ebûbekir el-müderris, Mustafa Çelebi b. Ali, Mehmed Beşe b. Sinan, Musa b. Ca‘fer, Ali ve gayruhum mine’l-huzzâr.