Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 304 Hüküm no: 436 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Nikola’nın değirmen ve mahzendeki hissesini Veli Beşe’ye sattığı Mahmiye-i İstanbul’da Unkapanı’nda olan uncu tâifesinden Kara Nikola v. Todori nâm zimmî mahfil-i kazâda işbu râfi‘u’l-kitâb Veli Beşe b. Şükrullah mahzarında ikrâr-ı tâm ve takrîr-i kelâm edip İznikmid kazâsına tâbi‘ Değirmenderesi nâm karyede vâki‘ ma‘lûmü’l-hudûd olup Deresuyu demekle ma‘rûf nehir üzerinde dâir bir göz değirmende yüz çuval undan mülkiyet üzere mutasarrıf olduğum altı çuval un hissemi ve yine karye-i mezbûrede sâhil-i bahrde vâki‘ bir tarafı Uncu Memi mahzenine ve bir tarafı Modron mahzenine ve bir tarafı değirmene ve taraf-ı râbi‘i sâhil-i bahre müntehî bir bâb mahzende olan yüz akçeden mülkiyet üzere mutasarrıf olduğum altı akçe hisse-i şâyi‘amı dahi safka-i vâhide ile tarafeynden îcâb ve kabûlü hâvî bey‘-i kat‘î ile mezbûr Veli Beşe’ye sekiz bin nakd râyic fi’l-vakt fıddî akçeye bey‘ ve teslîm edip ol dahi iştirâ ve tesellüm ettikden sonra semeni olan meblağ-ı mezbûr sekiz bin akçeyi mezbûr Veli Beşe yedinden bi’t-tamam ve’l-kemâl ahz u kabz eyledim, min-ba‘d zikrolunan değirmen ve mahzende olan hisselerde vechen mine’l-vücûh alâka ve medhalim kalmadı keyfe mâ yeşâ’ ve yehtâr mutasarrıf olsun dedikde mezbûr Kara Nikola’yı ikrâr-ı meşrûhunda el-mukarru lehü’l-merkūm Veli Beşe vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâdis min-Şevvâli’l-mükerrem li-sene erba‘a ve sittin ve elf. Şuhûdü’l-hâl: Mehmed Beşe b. Mustafa, Seydî Beşe b. Ali, Ali Beşe b. Yusuf, İbrahim Beşe b. Ali, Ali Beşe b. Derviş, Ali b. İsmail, Selim b. Mustafa ve gayruhum mine’l-huzzâr.