Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 349 Hüküm no: 427 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce bt. İslâm ile Mehmed Beşe’nin muhâlaa yoluyla boşandıkları Muhâla‘a. Mahmiye-i İstanbul’da Gül câmi‘i mahallesi sâkinelerinden olup zâtı Mustafa Beşe b. Ramazan ve Hüseyin Beşe b. Mehmed nâm kimesneler ta‘rîfleriyle mu‘arrefe olan Hadîce bt. İslâm nâm hatun meclis-i şer‘-i hatîr-i lâzımü’t-tevkīrde zevc-i dâhili işbu râfi‘u’l-kitâb Mehmed Beşe b. Ramazan nâm kimesne mahzarında ikrâr ve takrîr-i kelâm edip mezbûr Mehmed Beşe zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan iki bin akçe mehr-i müeccelim ve nafaka-i iddet-i ma‘lûmem üzerlerine me’ûnet-i süknâm dahi kendi üzerime olmak üzere zevcim mezbûr Mehmed Beşe ile muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyete vesâir beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan zevcim mezbûr Mehmed Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik benim zimmetimi hukūk-ı ma‘lûme ve mechûleye müte‘allika âmme-i da‘vâdan ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-M sene 1144. Şuhûdü’l-hâl: Mustafa Beşe b. Ömer, Mehmed Ağa b. Ahmed, Mustafa Beşe b. Mehmed, Hüseyin Beşe b. Mehmed, Mustafa Beşe b. Ramazan, Du‘âcı İbrahim b. Mustafa ve gayruhum.